Håpar å unngå kritisk situasjon

Kraftverket er ikkje upåverka av koronasituasjonen. – Me har eit særleg ansvar for å syta for kraftforsyninga i Kvam og har måtta ta forholdsreglar, seier dagleg leiar Arne Tillung.

Har vurdert kritisk nivå

Kritisk driftspersonell er plassert på ulike lokasjonar, og mange arbeider frå heimekontor. Det er nesten ikkje folk att på kontoret på Kaldestad, der dørene er stengde for vitjande, fortel Tillung. – Det fungerer godt. Kundane når oss på telefon og nett som før. Sentralbordet er plassert rundt i bygda.Noregs vassdrags- og energidirektorat har sett beredskap. Kvam kraftverk er med i Kraftforsyningens beredskapsorganisasjon.Splittinga av dei tilsette er del av beredskapstiltaka. Førebels går drifta som normalt. – Me har vurdert kva som er eit kritisk nivå med tanke på tal personar til å driva nettet. Me håpar ikkje me kjem i ein slik situasjon. Viss store delar av arbeidsstokken skulle verta smitta, vil me få utfordringar med drifta, men det skal mykje til, seier Tillung.

Små grupper

Mannskapet som ikkje arbeider heimefrå, er delt i små grupper. Noko av arbeidet krev fire hender, og då må to personar i éin bil aksepterast.Møteverksemda føregår med bruk av Skype.Tidlegare i månaden tok det fyr i noko isolasjon ved ein vegg på Skulafossen kraftstsjon. Sotstøv er vaska, og stasjonen var i normal drift att for nokre dagar sidan, fortel Tillung.