Fleirtal mot kraftkabel til Skottland

– Det ser ut som stemninga i landet er mot, og det er synd. For kabelen vil vera positiv for både økonomien i Noreg og klimaet, seier fungerande ordførar Aslak Lægreid (H) i Eidfjord til NRK.Det er NorthConnect som har søkt om løyve til den undersjøiske straumkabelen mellom Hardanger og Skottland.Målet er å utveksle straum begge vegar: Noreg kan eksportere vasskraft når det er lite vind i Storbritannia, og importere vindkraft når Storbritannia har overskot. Kraftsamarbeidet er tenkt å redusere Storbritannia sitt CO2-utslepp frå kolkraftverk.Høyringsfristen gjekk ut denne veka og den negative responsen er i fleirtal.Av 70 høyringssvar (pr. 11. mars klokka 15:30) meiner 29 organisasjonar og bedrifter og 23 privatpersonar at Stortinget må seie nei til konsesjon for utbygginga.Dei dominerande motstandarane er eigarar og fagforeiningar i kraftkrevjande industri. LO og industrikommunar som Høyanger, Årdal, Ullensvang og Sauda er også negative.Til saman er tolv høyringssvar positive til kabelen. Mellom anna NorthConnect og dei tre eigarselskapa Agder Energi, Hafslund E-CO og Vattenfall. Også Statkraft, ulike kraftorganisasjonar, NHO og miljøorganisasjonen Zero, i tillegg til Eidfjord kommune, seier ja til konsesjon.Seks høyringssvar er relativt nøytrale, ifølgje NRK.Saka skal til behandling i Energi- og miljøkomiteen på Stortinget no i mars, og Stortinget skal etter planen ta ei avgjerd 21. april.

NPK