Yrkesfaga er på frammarsj

Søknadsfristen til dei vidaregåande skulane gjekk ut 1. mars. Tal frå Vestland fylkeskommune syner at Kvam vidaregåande skule har hatt ein liten nedgang i talet på såkalla primærsøkjarar, altså søkjarar som har fag på skulen på 1.-plass. Før førre skuleår var det 196 primærsøkjarar. Til komande skuleår er talet 192.

Tala fortel at det har vore ein nedgang i talet på søkjarar til studiespesialisering på alle dei tre trinna. Til førre skuleår var talet 136. Til komande skuleår er det 126.

Talet på søkjarar til yrkesfag har auka samanlikna førre skuleår. Statistikken frå mars i fjor synte 57 søkjarar. I år er talet 66.

– Skulle hatt fleire

Rektor Arild Matland fortel at det er ei utfordring for skulen er at ein del av elevane som går på yrkesfag på VG1 ønskjer å gå på fag skulen ikkje har på VG2.

– Me er ein liten skule med eit avgrensa utval på VG2-nivå. Dermed forsvinn ein del yrkesfagelevar frå skulen etter VG1. Det er til dømes mange som ser føre seg ein karriere innan oljerelaterte verksemder og anna me ikkje tilbyr, seier han.

VG2-faget transport- og logistikk, som skulen starta i fjor haust, har berre fått fire primærsøkjarar.

– Me skulle gjerne hatt fleire, men me har fått beskjed frå fylkeskommunen om at me skal få nokre år på oss til å få faget opp og gå. Me meiner sjølve at me på kort tid har utvikla eit fag med høg kvalitet. Dette er eit fag som delvis vart oppretta etter eit ønske frå næringslivet. Så spørst det om dei unge er like interesserte i dette faget som behovet tilseier. Me må sjå på korleis me kan skapa meir blest rundt faget, seier Matland.

Fleire «bonus-elevar»

Sidan 1998 har Kvam vidaregåande skule tilbode elevar på VG2 studiespesialisering å ta eit år ved St. Paul Lutheran High School i Missouri. Matland fortel at fleire elevar frå andre kommunar no ser ut til å ha fått opp augo for dette tilbodet.

– Dette skuleåret har me fem elevar i USA som ikkje har hatt tilknyting til Kvam vidaregåande skule. Til neste skuleår har talet på søkjarar utanfrå stige til 12. Det tyder på at me har klart å gjera tilbodet betre kjent i resten av fylket. Dette er veldig positivt for oss. Desse elevane er bonus-elevar som går på eit skuleår i USA via oss. Det er positivt for oss både økonomisk og for statistikkane, seier Matland.

Talet på primærsøkjarar gjev berre ein peikepinn på kor mange elevar skulane kan venta seg. Ein del elevar som har skulen på 2.-plass, endar opp på skulen. Det er òg elevar som har skulen på 1.-plass, men som ombestemmer seg og i staden endar opp på ein annan skule.

– Først når me kjem ut i september, er dei endelege elevtala klare. Me kan fort enda opp med nokre elevar i pluss eller nokre elevar i minus samanlikna med dei tala me har fått no. Dette skuleåret har me vore 184 elevar, om ein tek med dei som studerer i USA. Eg håpar og trur at talet på elevar til neste skuleår vert litt høgare, seier Matland.

Gode tal frå Framnes

Framnes Kristne Vidaregåande Skule er privat og difor ikkje å finna i tala frå fylkeskommunen. Rektor Harald Voster fortel om sterke søkjartal til neste skuleår. Ifølgje Voster har talet på søkjarar gått opp med om lag 13 prosent.

Det er talet på søkjarar til idrettsfaga som aukar mest, men det er òg ein liten auke i talet på søkjarar til studiespesialisering, fortel han. Om ein berre ser på tala for VG1, syner tala at det er 111 søkjarar til studiespesialisering, medan det er 102 søkjarar til idrettsfag.

Han fortel at skulen til saman har 433 søkjarar. Det er ein auke på 41 samanlikna med i fjor.

– Mange privatskular opplever nedgang i søkjartala, så dette er veldig gledeleg, seier Voster.

Skulen har berre plass til 270 elevar. Det betyr at ein del søkjarar kan få avslag.

– Men eg veit av erfaring at sjølv om me har gode søkjartal, kan det verta vanskeleg å fylla opp skulen. Mange som har søkt hos oss, endar opp på andre skular. Det er først i slutten av august me ser kor mange elevar me får, seier han.