Ynskjer velkomen til fjellet

Sissel Huse er niesa til mannen bak det heile: Bjarne Huse. Han bygde opp hyttetunet på Breidablik, og ho var stadig med opp då ho var lita.

– Ifølgje mammo og pappen grein eg alltid då me skulle gå ned att, for det var så kjekt å vera her, fortel ho.

Sidan DNT overtok hytta i 2012, har Huse vore hyttevert fleire gongar. Denne sommaren fyller ho rolla for fyrste gong sidan hennar fem år gamle dotter vart fødd. Huse likar seg i fjellet.

– Her er så fritt og ope! Og ein gløymer klokka – det er kanskje det beste, seier ho.

Før den nye hytta vart bygd, var ho hyttevert i ei regnfull sommarveke. Det var berre tre personar innom totalt, og det var lite å ta seg til.

– Eg gjekk inn i ein modus der eg landa fullstendig. Eg var heilt aleine i skodda på fjellet. Det var fantastisk! fortel Huse.

Ifølgje henne er fjellet den beste staden å kopla av. Tida gjekk med til vedfyring, lesing, matlaging og kabal.

Meir populært

Dei siste åra har fleire og fleire turgåarar kome innom Breidablik. I sommar har om lag 450 personar skrive seg i hytteboka. Huse trur sosiale medium har mykje med saka å gjera.

– Folk deler bilete og ryktet går. I tillegg ligg det gode kart og hjelpemiddel på UT.no. Det gjer nok at fleire tek turen, seier ho.

Barnefamiliar utgjer om lag halvparten av dei som vitjar Breidablik. Mange går frå hytte til hytte og overnattar til dømes på Vending. Huse fortel at det er nok turlagshytter til at ein kan gå i fleire dagar med passelege etappar. Mykje av jobben til ein hyttevert er å snakka med gjestene.

– Me spør kvar folk kjem frå og kvar dei skal, seier Huse.

Ho forklarer at det har med fjelltryggleik å gjera. Dersom nokon vert sakna, kan ho fortelja når ho såg personane sist, og kva retning dei gjekk i.

Vertane på Breidablik er der i hovudsak for å svara på spørsmål og gje råd om turruter. Hyttegjestene lagar mat og vaskar ut sjølve. Då HF vitja Huse og dottera fredag 28. juli, hadde dei hatt 150 overnattingsgjester i løpet av veka. Ei av nettene sov 32 personar i hyttene. Då var det fullt.

– Nokre spelar kort, andre lagar mat eller pussar tenner. Det surrar godt, fortel Huse.

– Kvar er køen?

I prinsippet kan kven som helst vera hyttevert. I sommar har det vore vertar på Breidablik det meste av tida.

– Eg undrar meg over at det ikkje er kø for å få denne oppgåva, seier Huse.

Ein av årets hyttevertar var på Breidablik for fyrste gong i sommar. Han vart glad då det kom nokre lokalkjende gjester som kunne litt om historia til staden og fjelltoppane i området.

– Nokre vertar er godt kjende her. Andre er heilt ferske. Begge delar går an, fortel Huse.

Eventyrleg oppleving

Dei fleste av hyttegjestene er nordmenn, men også utanlandske turistar finn vegen til Breidablik. Huse fortel at ho har treft både tyskarar, franskmenn, engelskmenn og ein argentinar.

– Eg ser forbausinga i ansiktet på alle som kjem inn på tunet. Breidablik er ganske imponerande! seier Huse.

Hyttegjestene er nyfikne og undrar seg over at det går an å byggja noko slikt midt oppå fjellet. Sjølv etter mange turar opp hit vert også Huse stundom overvelda.

– Breidablik er som teke ut av eit eventyr, fortel ho.