Ynskjer seg fotballbane og trimløype

Dersom det går som Vestland fylkeskommune, Kvam herad og fleire frivillige organisasjonar vil, kan små og store gle seg til ein attraktiv og inspirerande boltreplass.

For å koma i gang med prosjektet, har Norheimsund Fotballklubb søkt Kvam herad om pengar til prosjektering og bygging av ein sjuarbane for fotball og ei trim- og turløype.

Søknaden frå styreleiar Erlend Ellingsen kom for seint til at rådmannen hadde moglegheit til å ta han med i budsjettforslaget for 2023, men han kan verta teken opp i 1. tertialrapport til våren.

Klubben har søkt om 1,75 millionar kroner, pluss 350.000 kroner til trimløypa. Totalt er anlegga kostnadsrekna til 3,66 millionar kroner. Spelemidlar og dugnadsinnsats utgjer mellomlegget. Summane er utan moms.

Klubben ser det som vesentleg at anlegga som vert utvikla fyrst, ikkje går på kostnad av areala for anlegg som kan byggjast seinare.

Det vert planlagt benker og bord, utsiktspunkt, sklier, stigar og område for klatring og buldring, disser, tau, ringar, hengjenett, turn, dans, parkour og skating.

Ynskjer realisering

Den kommunale idretts- og anleggsplanen på 1980–1990-talet var starten for idrettsanlegget på Haugamyr, fortel «medlem og engasjert» i Norheimsund Fotballklubb, Hogne Høysæter.

Laget har sidan seint på 1990-talet arbeidd for utvikling av anlegget. Ein fekk laga ein reguleringsplan og bygd den nye fotballbanen med kunstgras som hovudstadion. Sidan har bruken av det andre anlegget gått ned, fortel Høysæter. Den gamle grusbanen vert i dag nytta av Kvam Biketrial.

Intensjonane og planane frå forprosjektet i 1999 er tekne vidare i planar som konsulentselskapet Cowi AS laga i 2016, og rådgjevingsselskapet Asplan Viak AS fylgde opp i 2021. Det skjedde med stønad frå Vestland fylkeskommune og Kvam herad. Då var det eit breitt engasjement, minnest Høysæter.

– Med godkjende arealplanar og kommunalt eigde areal er det no ynske om å realisera nokre av anlegga. Det er teke eit initiativ for å samla representantar for ulike idrettar og aktivitetar slik at ein sikrar at utviklinga skjer saman med interessene som er i området, skriv klubbleiar Ellingsen i søknaden.

Det viktigaste å få sett i gang er sjuarbane, tur- og trimløyper, minifriidrettsbane og garderobar og klubbhus. Dette er anlegg som har store kostnader, og ein må ta tida til hjelp, opplyser Ellingsen.

Vonar på spelemidlar

Sjuarbanen må prosjekterast og opparbeidast av firma med kvalitetar som gjev grunnlag for utbetaling av spelepengar. Tur- og trimløypa vil verta lengre enn éin kilometer, og vil såleis kunna få spelepengar.

Norheimsund Fotballklubb ynskjer at heradet vert ein aktiv part i utviklinga av området, slik at interessene til skular, barnehagar og uorganiserte vert varetekne, opplyser klubben.

Planane viser korleis mange ulike aktivitetar og idrettar kan samlokalisera ulike anlegg og skapa ein møteplass for store og små. Nærleiken til barnehagar, skule og sentrum gjev gode moglegheiter for mykje bruk av anlegga, skriv Ellingsen i søknaden.

– På tide å kveikja liv

Høysæter seier Haugamyr-prosjektet har lege brakk lenge, og at det var på tide å kveikja liv i det igjen. Han har vore engasjert i fotballen og anlegga rundt han sidan han flytta heim frå Haugesund seint på 1990-talet.

Det er behov for å gjera noko og koma vidare, meiner han. Det har vore snakka om prosjektet lenge og vorte lagt diverse planar.

– Kvifor prioriterer de sjuarbane og trimløype?

– Ein må byrja ein stad. Fotballen har behov for at aldersbestemde lag har nok plass til å avvikla treningar og kampar på fornuftig vis.

– Kven vonar de vil finansiera heile parken på meir enn 18 millionar kroner?

– Me må søkja ulike plassar over lang tid. Det har dei gjort på Voss i samband med aktivitetsparken dei har fått til der. Dei har brukt uendeleg mange år på det. Det må me gjera her òg.

– Mykje god omtale

– Aktivitetsparken har fått masse positiv omtale. Men når det er alle sitt anlegg, så er det liksom ingen som tek ansvar. Nokon må byrja, seier Høysæter.

Prosjektet er i ein tidleg fase. Det har vore møte mellom ein del interesserte. Dei som over lang tid har vist positiv interesse, kan få med seg fleire, og ein kan få laga ei gruppering som kan ta ansvar for fullfinansiering og bygging, påpeikar Høysæter.

For å koma i gang, er det viktig å gje eit signal om at dette er mogleg å få til, meiner han. Ein er i den heldige situasjonen at området er kommunalt. Arealplanane tilseier at ein aktivitetspark er mogleg å få til.

– Det er ofte ein bøyg for slike prosjekt, seier Høysæter.

– Ver tolmodige!

Han seier det er bygd mange anlegg i Kvam der nokon har sett seg i førarsetet og teke initiativ. Ein har brukt tid på å områ seg og skaffa finansiering. Det går ofte lang tid.

– Det er berre å ha tolmod og prøva. Og får ein det ikkje til, så har ein i alle fall prøvd, seier Høysæter.

– No er det dei som driv med biketrial som er mest aktive her. Men staden er ikkje nokon pryd for auga. Når ein får gjestande fotballag, så ser ikkje garderobeanlegget spesielt bra ut, seier Høysæter.

Han ynskjer seg turstiar og stader der folk kan trimma utan at det er organisert. Også barnehagar og skular og andre som er på tur, vil kunna bruka anlegget.

– Det er viktig å skapa engasjement. Viss ikkje det skjer, så er det gjerne ikkje eit behov. Men eg har tru på at det kan verta eit bra anlegg for mange. Tida får visa, seier Høysæter.

– Gjer kroppen ei teneste

Leiar Ellingsen er fysioterapeut.

– Kva er det å vinna i folkehelse med eit slikt prosjekt?

– Det vil gje variert aktivitet, og ein kan få rørsleglede. Di større variasjon det finst av tilbod, di større er sjansen for at du finn noko du likar. Og finn du noko du likar, så er sjansen større for at du vil halda på med det lenger. Og held du på med noko lenger, då gjer du kroppen ei teneste, seier Ellingsen.