Ynskjer samlingsstad i ly for vêret
Framnes Kristne Vidaregåande Skule i Vikøy ynskjer å byggja ein gapahuk og ei badstove nord på halvøya der skulen ligg.
Skulen har difor søkt om dispensasjon frå byggjegrensa langs sjøen i kommuneplanen. Gapahuken vil kverrsetja 49 rutemeter og badstova 16 rutemeter.
Grunngjevinga for søknaden er at bygningane er naudsynte for undervisinga og som samlingsplass for skulen og ålmenta. Tiltaka vil ikkje vera til hinder for ålmenta eller turstiar i skuleområdet. Bygga vert plasserte og utforma slik at dei vert lite synleg i landskapet, ifylgje rådmannen, som har bede overordna styresmakter uttala seg i saka.
Den førebelse vurderinga til rådmannen er at korkje gapahuken eller bodstova set intensjonen med byggjegrensa mot sjø vesentleg til side. Plasseringa er ikkje i konflikt med eksisterande vegar, og ho tek omsyn til landskapet og terrenget. Bygningane vert lite synlege frå fjorden, og er i samsvar med arealføremålet i kommuneplanen som omsluttar skulen.
Rådmannen har kome til at føremonene for skulen er større enn ulempene. Mellom dei positive sidene er betre undervising, samlingsplass for elevar, nytte for ålmenta og ein material- og fargebruk og ei plassering som tek omsyn til landskap og terreng. Ulempa er at ein vil fråvika hovudregelen i kommuneplanen.
Rådmannen tilrår difor å godkjenna dispensasjonssøknaden. Dersom Statsforvaltaren og fylkeskommunen er positive til søknaden, kan han handsamast delegert som ei såkalla kurant sak.
Skulen treng å utvida undervisingsfasilitetane då han har idrettsline, to klassar for friluftsliv og ein del spesialundervising og tilrettelagd undervising. Skulen ynskjer å nytta seg av nærleiken til sjøen og uteområdet. Det manglar ein utestad med ly som er eigna til undervising, heiter det i søknaden.
