Ynskjer ny tilskotsordning
Herand Båtlag har søkt Ullensvang kommune om eit årleg tilskot på 35.000 kroner til drift av sørvisbygget i båthamna i Herand.
Laget ber i tillegg om retten til å driva kring tjue gjesteparkeringsplassar på kommunal eigedom i hamna.
Sørvisbygget gjev turistar, hytteeigarar og medlemer av laget tilbod om toalett, garderobe, dusj, straum og vaske- og turkemoglegheiter. Tilbodet gjev laget store kostnader. Inntekter krevst difor.
Eit godt utstyrt bygg kan trekkja fleire turistar til området, noko som kan auka omsetninga til lokale bedrifter. Toalett kan bidra til å redusera forsøpling og ureining, meiner båtlaget. Ein organisert parkeringsplass kan bidra til å minimera miljøpåverknaden, ifylgje laget.
Sørvisbygget kan òg tena som eit trygt område i naudsituasjonar, og tilgang til straum kan lata turistar lada elektroniske einingar.
Båtlaget fekk tidlegare eit årleg tilskot frå Jondal kommune og hadde rett til å henta inn parkeringsavgift. Denne avtalen vara i 25 år. Inntektene gjekk til etablering, drift og vedlikehald av sørvisbygget, opplyser laget.
