Ynskjer nesten fem millionar frå kraftfondet

I alt søkjer dei om 4.893.000 kroner frå potten.

Godt over halve summen ber den eine av søkjarane om. Hardanger og Voss museum ynskjer 3 millionar kroner til utvikling av Smietunet ved Hardanger fartøyvernsenter.

Museet har tidlegare fått 3 millionar kroner frå kraftfondet til prosjektet Tett på, den gongen som del av budsjettvedtaket og utan saksutgreiing.

Saksutgreiing ligg enno ikkje føre i alle sakene i denne runden. Sjølv om heradsstyret har møte tysdag 12. mai, legg rådmannen opp til å handsama berre 3 av søknadene i møtet:

• Rådmannen rår til å gje 250.000 kroner til næringslaga i Norheimsund, Øystese, Ålvik og på Kvamskogen til ein kampanje som skal få kvemmingane til å handla lokalt. Summen er likelydande med søknaden. Rådmannen meiner søknaden er i tråd med alle dei fem kriteria søknadene vert vurderte etter, og ser det som positivt at laga samarbeider. Ho krev ikkje finansiering frå andre kjelder av di prosjektet kan reduserast, og er villig til å betala ut pengar på grunn av fakturaer for å unngå at laga får likviditetsproblem.

• Rådmannen vil gje 150.000 kroner til marknadsføringstiltak i regi av Visit Hardangerfjord AS. Føresetnaden er at føretaket kan dokumentera at pengane ikkje går til «løpande drift», men «vidareutvikling», i tråd med reglane for fondet. Søknaden lyder på 250.000 kroner. Rådmannen minner om at det kjem nye tildelingar i år. Ho meiner elles at søknaden er i tråd med alle kriteria for tildeling.

• Kvam Næringsråd vil gje 50.000 av 200.000 omsøkte kroner til fleire marknadsføringstiltak. Rådmannen meiner søknaden tyder på at tiltaka er løpande drift, men vil yta pengane så sant søkjaren kan dokumentera at dei gjeld vidareutvikling. Rådet har bede om å få utbetala 50.000 straks fordi tiltaka skal hasta, men rådmannen har avvist dette.

Sakspapira vart sende til dei folkevalde to døger før møtet. Dei andre søknadene vil i utgangspunktet ikkje verta handsama før heradsstyremøtet 16. juni.