Ynskjer lågterskeltilbod for nokre av dei som slit mest

Pengane skal gå til ei kaffimaskin, inventar og kvitevarer for 200.000 kroner. Avdelinga ynskjer seg òg ei 40 prosent stilling som miljøarbeidar til 202.000 kroner.

Utstyret og arbeidaren skal nyttast til eit lågterskeltilbod eit par dagar i veka, der brukarane kan kjøpa og selja god kaffi, slik =kaffe gjer i Oslo. Dette har vore etterspurt av brukarane.

Pengane er søkte om frå eit tilskot til mellombels styrking av eksisterande behandlingstilbod innan psykisk helse og rusarbeid.

Ein vil få ein ekstra husleigekostnad og noko oppstartsutgifter. Oppstarten er avhengig av finansiering. Brukarane seier det er viktig å ha tilbodet sentralt i bygda.

Avdelingsleiar Anne Merete Flekstad Vik skriv at det er krevjande å setja av ressursar til eit slikt tiltak, då ein allereie har ei svært omfattande og godt bruka teneste.

— Me har gjort ulike tiltak for å letta situasjonen for dei som har vore ekstra isolert i koronaperioden, skriv Vik.

Dei med rusutfordringar har vore utsette for påkjenningar med frykt for smitte og frykt ved kontakt med andre, og dei har isolert seg meir i koronaperioden.

Ein ribbtur til Botnen for nokre brukarar gav ei spektakulær oppleving, og med etterfølgjande komlemiddag gav det ei kjensle av normalitet og eit positivt minne, skriv Vik.

Det har vore ein auke i tilvisingar til avdeling for rus og psykisk helse, med 47 nye frå april til september.