Ynskjer lågare fart i Eikedalen
Samningane ser ei sjølvmotseiing i fartsgrensedebatten på Kvamskogen.
Det vart i fyrste omgang inga endring av fartsgrensa på Kvamskogen, etter ein lang prosess sidan høyringa hausten 2019. Kommunestyret i Samnanger sende i vår ei fråsegn i saka, etter at Statens vegvesen hadde avslege søknaden frå fylkeskommunen om å setja ned grensa til 60 kilometer i timen.
Kommunestyret tok til orde for å setja ned fartsgrensa frå 70 til 60 også i Eikedalen. Politikarane viste til at Eikedalen har kring 30 fastbuande. Lågare fart vil gje dei betre trafikktryggleik og lokalmiljø.
— Det vil vera underleg dersom ein i eit område med fastbuande skal ha høgare fartsgrense enn ein vil få på Kvamskogen, heiter det i fråsegna.
Politikarane viste til at heradsstyret i Kvam i høyringa hausten 2019 fremja ynske om fleksible fartsgrenser på Kvamskogen. Om ei slik ordning skulle koma i stand, meiner kommunestyret i Samnanger likevel at grensa i Eikedalen bør verta 60.
Rett før sommaren gav heradsstyret i Kvam støtte til å redusera grensa frå 80 til 60 på strekkja mellom landhandelen og Ungdomsheimen-tomta. Vona er at endringa, saman med ein forenkla gang- og sykkelveg, kan stryka det segnomspunne rekkjefylgjekravet i kommunedelplanen frå 2011.
