— Ynskjer ein skikkeleg prosess
— Det nære samarbeidet som verneprosessen føreset, har me ikkje sett noko. til.
Det skriv ordførar Torgeir Næss (Ap) i til Miljøverndirektoratet. Skrivet er ei oppfølging av diskusjonen i formannskapet 24. november om oppretting av ein nasjonalpark i kvammafjella.
I september vart det kjent at regjeringa ynskjer å gje fjella nasjonalparkstatus. Før den tid har ikkje Kvam herad vorte bede om noko synspunkt i saka, bortsett frå at ein kommunal leiar deltok i eit «webinar» om saka i februar.
Direktoratet har på heimesida si opplyst at dei nasjonalparkalternativa som ikkje er forkasta, har lokal støtte. Næss meiner ei slik støtte er uttrykt korkje frå det politiske miljøet eller andre i Kvam.
— Me har ikkje fått høve til å støtta eller gå mot dette, skriv Næss, som etterlyser ein skikkeleg prosess der heradet kan medverka og verta høyrt.
Han ber om tilgang til ei utgreiing eller innstilling som kan vera grunnlag for både å henta inn lokale innspel frå ulike råka interesser og for ein politisk debatt om saka.
Då HF spurde kva som har fått direktoratet til å konkludera med at nasjonalparkideen i Kvam har lokal støtte, svara fagdirektør Olav Nord-Varhaug i verneseksjonen at signala frå Kvam herad i webinaret vart tolka som at det kunne vera interesse for å drøfta forslaget nærare.
I haust bad regjeringa direktoratet om å påleggja statsforvaltarane å gå vidare med nasjonalparkar der det synest å vera kommunal aksept. Fagdirektøren reknar med at Statsforvaltaren i Vestland vil kontakta dei tre kommunane etter nyttår. I realiteten har kommunane vetorett. Det er ikkje aktuelt å setja i gang ein verneprosess i strid med ynsket til kommunane, opplyser fagdirektøren.
