— Ynskjer blest

Vestland Bondelag arrangerte sundag eit traktortog for å demonstrera mot jordsbruksoppgjeret, som enda med brot i tingingane. Bondelaga lokalt heiv seg med og hjelpte til med å skaffa folk til å køyra.

Bortimot 30 traktorar var i rekkja då dei passerte Norheimsund og Øystese litt utpå ettermiddagen.

— Me ynskjer mest mogleg blest, seier leiar i Strandebarm Tørvikbygd Bondelag, Sindre Skjelnes Tveit.

Tysdag 4. mai leverte staten tilbodet i jordbruksforhandlingane, og laurdag varsla landbruksorganisasjonane at dei bryt tingingane.

— Avstanden var for stor mellom regjeringa si forståing av røynda og det inntektsløftet vi meiner er heilt naudsynt. Difor bryt me, seier leiar i Vestland Bondelag Anders Felde i eit skriv på bondelaget si nettside.

Dei fyrste traktorane starta i Rosendal, og toget skal enda på Voss. Måndag skal ein traktor vidare austover og delta i ei samling av traktorar i hovudstaden tysdag.

— Det er for å visa at me er her. Me vil visa at det er mange bønder rundt i kommunane som treng ei inntekt det er råd å leva av, seier Tveit.

Bonden meiner det viktigaste er å få fram at maten ikkje kjem av seg sjølv, og seier at pandemien har vist kor viktige bøndene er. Det tek tid å avla fram dyr og dyrka frukt og grønt.

— Landbruk er langdrygt, og noko må gjerast no, seier Tveit.