Ynskjer betre uteområde ved barnehage
Uteområdet ved Ålvik barnehage treng opprusting, meiner samarbeidsutvalet.
– Området har verkeleg sett betre dagar. Det er lite utfordrande og har få apparat, skriv Elisabeth Fosse på vegner av utvalet i eit brev til Kvam herad.
Ifylgje henne vantar det noko å klatra på, særleg for dei eldste. Dei kjedar seg utandørs. Fleire leikeapparat er dårlege og benken er delvis roten.
Fosse minner om at uteområdet vert nytta også under arrangement som 1. mai, 17. mai og fotballturneringar. I tillegg har ein cateringaktør etablert seg i kjellaren.
– Eit betre uteområde vil gagna mange, skriv Fosse.
Ho meiner heradet sjølv burde ta ansvar for oppgraderinga, men opplyser at foreldre tilsette og andre er klare for dugnad. Planen er å samla inn pengar gjennom loppemarknad, basar, Spleis og søknader til verksemder og lag.
Utvalet har laga eit investeringsoversyn med ein samla kostnad på nær 330.000 kroner med moms. Den største summen utgjer klatrestativet til vel 200.000 kroner.
