Ynskjer å setja festivalpreg på bygda

Festivalen har søkt Statens vegvesen om å få stengja fylkesveg 49 og Kaien i sentrum for trafikk i den nemnde helga. Det får han ikkje lov til dersom vegvesenet fylgjer rådet frå fylkesvegeigar Vestland fylkeskommune.

Styrelem Geirmund Storaas har søkt om å få merkja den ynskte omkøyringa.

Årsdøgntrafikken på vegen er høg, 3.800 køyretøy, og 7 prosent er lange køyretøy. Stenging av fylkesveg 49 vil redusera framkoma og føra til monalege trafikale utfordringar i sentrum, påpeikar fylkeskommunen. Gamle Sandvenvegen er lite eigna som omkøyringsveg når trafikkmengda er så stor.

Å stengja fylkesveg 49 kan òg føra til auka trafikkfare for mjuke trafikantar, meiner fylket. Ein ottast at mange vil koma gåande langs dei kommunale vegane frå parkeringsplassar til festivalområdet. Gåande vil òg koma frå busshaldeplassen, som truleg er planlagd flytta for festivalen.

Storaas viser til at ein på fleire torgdagar, mellom anna i 2002, fekk løyve til å stengja fylkesveg 49 og leia trafikken via Grovagjelet og gjennom skuleområdet på Gamle Sandvenvegen.

— Bruken av hovudgata som «gågate» med stands under marknaden gav særs hyggjeleg festivalstemning i bygda, skriv Storaas.

Både trebåtfestivalen og Hardingtonar har vorte avlyste i to år på grunn av pandemien, men i juni startar ein opp att med eit omfattande konsert-, marknads- og trebåtprogram.

— Me ynskjer å slå på stortromma og setja festivalpreg på bygda, skriv Storaas.

Han legg til at Kaien har vore stengd og busshaldeplassen flytta til skuleområdet i alle dei 22 åra trebåtfestivalen har vore arrangert. Storaas inviterer styresmaktene til ei synfaring.