Ynskjer å nytta KI på skulen
Sondre Fagerheim Lunestad vil nytta kunstig intelligens på skulen. Han nytta høvet til å spørra kunnskapsministeren om når det kan skje.
Lunestad følgde med då kunnskapsminister Kari Nessa Nordtun vitja Kvam. I innlegget sitt fekk ho salen med på eit eksperiment. Alle med Snapchat installert på telefonen fekk beskjed om å spørja «My AI» om kven som er kunnskapsminister i Noreg.
Kva får de til svar? spurde ho. Dei fleste fekk opp at Guri Melby er kunnskapsminister.
– Sjå kva svar eg fekk då eg søkte på dette i juni. Dette er eit verktøy som borna våre nyttar i det daglege, sa Nordtun, og viste fram at svaret var Trond Giske.
Kunnskapsministeren sa at Noreg ikkje treng å vera fyrst ute med all teknologi, men vera best når ein faktisk tek det i bruk i skulen.
– Det finst svar og mykje informasjon, men her må me vera smarte. Me må vera veldig bevisste og læra borna våre om kjeldekritikk, sa kunnskapsministeren.
– Dei er fordomsfulle
Lunestad representerte Kvam ungdomsråd. Han ville ha svar på når kunstig intelligens (KI) skal innførast i skulen. Kunnskapsministeren er meir skeptisk til bruk av KI-robotar.
– Dei er fordomsfulle overfor kvinner og mørkhuda. Dei fremjar menn. Fagforeiningar er dei heller ikkje så veldig opptekne av. Me må hugsa kvar informasjonen kjem frå. Det er ikkje frå redaktørstyrte medium, men gjerne frå andre land me ikkje har lyst til å henta informasjon frå, svara Nordtun.
Kunnskapsministeren er oppteken av at lærarane må kjenna seg trygge på å bruka KI. Elevane forstår ikkje kva informasjon dei får, ifylgje Nordtun. Ho seier ungdom må ha grunnleggjande ferdigheiter fyrst, og så kan ein byggja vidare med kunstig intelligens på toppen.
– Eg er ikkje einig. Det ho seier, er berre dei politiske meiningane. Problemet er at ungdomar i dag, spesielt på ungdomsskulen, nyttar kunstig intelligens konstant i skulekvardagen og i fritida. Om skulen ikkje skal byrja bruka dette, kjem han til å henga mange år etter. Og elevane kjem til å nytta KI som juks til lekser og i skulearbeidet, seier 15-åringen.
– Då lærer du ingenting
Lunestad ynskjer å nytta kunstig intelligens til tips og triks i presentasjonar. Ein får meir spesifikke svar enn når ein søkjer på Google, seier han.
– Me veit me kan spørja ChatGPT om svar på prøven, og så får ein svaret. Det er ikkje eigentleg det me vil. Me vil finna svar på det me lurer på, utan å måtta leita gjennom mange sider slik som på Google, seier Lunestad.
Han dreg fram eit døme.
– Lat oss seia at eg skal laga ein presentasjon om migrasjon. I staden for at eg må gå inn for å leita, kan eg berre spørja om det eg lurer på spesifikt. Det mange gjer, er at dei ber ChatGPT laga ein presentasjon om migrasjon. Då vert det juks. Då lærer du ingenting, seier ungdomsskuleeleven.
– Treng hjelpa no
Han er trygg på at svara er rette, og meiner ChatGPT er meir treffsikker enn Snapchat sin kunstige intelligens. Det kjem opp om svaret må sjekkast nærare, seier han.
– Vil de eigentleg berre sluntra unna og finna svaret lett?
– Nei, for greia her er ikkje å spørja om svar på spørsmål. Det handlar om å få rettleiing. Det kan òg vera eit godt hjelpemiddel for lærarar som kan få tips til kva ein skal gjera i ein time eller andre ting, seier han.
Ifylgje Lunestad nyttar mange ungdommar kunstig intelligens til lekser og for å øva til prøvar. Men det kan fort resultera i at roboten gjer alt arbeidet, seier han.
– Det er det me vil unngå. Det er det kunnskapsministeren vil unngå òg, men eg meiner ho gjer det på feil måte.
Han understrekar at han ikkje har kompetansen til å vita korleis kunstig intelligens best kan nyttast i skulen. Men han understrekar at det må skje snart.
– Det hjelper ikkje oss om dei innfører kunstig intelligens om nokre år, for då er me ute av skulen. Me treng denne hjelpa no, seier han.
