Ynskjer å halda fram med skule
Dei tilsette ved Tørvikbygd skule meiner at det finst gode grunnar til å halda fram drifta av skulen eller utsetja nedlegginga.
I høyringsinnspelet i saka om eventuell nedlegging av skulen står det at det låge elevtalet kan gagna elevar som treng ekstra tilrettelegging og gje lærarane meir tid til kvar elev.
Dei tilsette skriv at elevane er positive til skulen. Elevrådet har spurt elevane om dei ynskjer nedlegging, og konklusjonen var «nei».
Høyringsinnspelet framhevar at aldersblandinga i skuleklassane har fleire positive sider. Dei tilsette ser trygge elevar og ser at yngre lærer av dei eldre elevane.
Dei tilsette skriv at elevane treng å førebu seg til ein eventuell overgang til ein annan skule, og at den nye skulen lyt ta aktivt del i prosessen. Det trengst ein tilvenjingsperiode for elevane, og dersom saka om nedlegging dreg ut, vert det for tidleg å leggja ned skulen frå august 2025, ifylgje høyringsinnspelet.
Dei tilsette støttar elles eit framlegg om at rådmannen skal leggja fram ei sak om eventuell etterbruk av Tørvikbygd skule.
