Widding vert ny leiar
Kjetil Widding tek over for Gunnar Skeie som dagleg leiar for Sparebankstiftinga Hardanger.
Det skjer når Skeie går av med pensjon til sommaren, nærare bestemt 1. juni.
Ifylgje ei pressemelding frå stiftinga melde mange gode søkjarar seg, slik at stiftinga har hatt eit luksusproblem. Rekrutteringa har Atle Bønes i Bønes Virik hjelpt til med.
Widding har variert leiarerfaring frå næringslivet i form av mellom anna bank, hotell, Hardanger Siderprodusentlag og Næringshagen i Ullensvang AS.
— Eg har vore heldig og fått jobba med spanande og viktige prosjekt i siderverda. Det har vore ei eventyrleg reise og ei fantastisk utvikling. No går eg over i ein posisjon der eg får jobba med heile Hardanger og Voss som arbeidsområde. Verdiskaping, utvikling av bygdene og å spela på lag med dugnadsånda vil vera fokusområde. Samstundes er det ein viktig jobb å sikra stiftinga sin posisjon som eigar i regionen sin viktigaste bank, seier Widding.
Styreleiar Per Berge i stiftinga meiner Widding kan bidra med råd innan forretningsutvikling og prosjektleiing, og er i stand til å forvalta kapitalen i stiftinga til beste for regionen.
