Vurderer ekstra kraftfond-runde

Rådmannen vil dela ut pengar frå næringsfondet allereie i juni.

Rådmannen vil truleg be politikarane om lov til å løyva pengar frå kraftfondet allereie i juni. Det har begynt å komma inn søknader, fortalde rådmann Anita Hesthamar i formannskapsmøtet tysdag.

– Me vil sjå om me kan gjera om vedtektene for å komma i møte dei utfordringane næringslivet har , sa ho.

Søknader om stønad frå kraftfondet vert vanlegvis handsama i samband med budsjettet i desember.

Heradet vil òg sjå på korleis ein kan få fart i einskildprosjekt for å bidra til oppdrag i næringslivet. Hesthamar drog fram nye Strandebarmheimen, som det vert arbeidd med. Også ny brannstasjon og ny vidaregåande skule prøver ein å ha framdrift i.

– Elles er det ikkje så mykje me kan gjera lokalt for næringslivet. Det er heilt andre musklar i dei nasjonale tiltaka, sa ho.

Heradet har nyleg teke opp eit lån på 111 millionar kroner. Planen var å setta pengane i obligasjonar, men det vert avventa for å sikra at ein har likvididet.

– Me prøver å gjennomføra vanleg drift og prosjekt i så stor grad som mogleg, sa Hesthamar.

Noko planlegging og administrativt arbeid er sett på vent som følge av beredskapsarbeid.