Vurderer å lysregulera Tokagjelet
Tokagjelet kan verta lysregulert for å sleppa høge bilar gjennom tunnelane når E16 skal oppgraderast.
– Me ser på om det kan løysast med at dei høgaste køyretøya for køyra sentrisk i tunnelane, og at trafikken i så fall vert styrt med eit skyttelanlegg når det er aktuelt. Me søkjer å finna ei teknisk løysing som berre vert aktivert når det faktisk er eit behov, slik at me unngår unødig venting for annan trafikk.
Det skriv overingeniør Jostein Vandaskog i avdeling for infrastruktur og veg i Vestland fylkeskommune til varaordførar Frode Nygård (Frp). Nygård spurde om lysreguleringa etter å ha fått spørsmål frå kvemmingar om saka.
Bakgrunnen for saka er trongen for ein lovleg omkøyringsveg for bilar høgare enn 4,0 meter når tunnelar på E16 vert oppgraderte og vegen er stengd.
Vandaskog opplyser at eit eventuelt framlegg om lysregulering må sendast på høyring til heradet og politiet, og godkjennast av Vegdirektoratet. Løysinga er nemleg ikkje normert.
