– Vurder kjøp igjen!
Foreldrearbeidsutvalet ved Øystese skule meiner at kjøp eller leige av «gymnaset» bør vurderast ein gong til.
Det tek utvalet til orde for i eit brev til dei folkevalde. Å bruka lokala på Rossvoll til mellombels skule vert ikkje perfekt, men kan gje fleire føremoner, skriv leiar Torgeir Kristian Børve i eit brev til dei folkevalde.
Mellom desse er at bygga er tilpassa til skuledrift, at alle elevar og tilsette kjem under eitt og same tak, at fasilitetar som auditorium, festsal, kjøken og kantine er på plass. Ikkje minst slepp ein born og undervising nær ein byggjeplass, og ein slepp å leggja til rette for «modulskule» ved idrettshallen.
– Det økonomiske aspektet kan ikkje me ta stilling til, men ein sparar i alle fall utgiftene som fylgjer med ein brakkeskule. I tillegg sit heradet med ein bygningsmasse som anten kan brukast til andre føremål eller seljast vidare når barneskulen er ferdig, skriv Børve, som meiner at leige kan vera eit alternativ om kjøp skulle verta vanskeleg.
Han påpeikar at bussane må sleppa av elevane ved ungdomsskulen, for å hindra busstrafikk til Rossvoll, og at færrast mogeleg foreldre må bringa og henta elevar ved skulen. Elles krev FAU at uteområdet vert best mogeleg.
FAU åtvarar mot lang utsetjing av byggjestart ved Øystese skule, men meiner at ei viss utsetjing må vera greitt, sidan entreprenøren truleg kan ta att tid dersom heile skuleområdet vert tomt for elevar i byggjefasen.
Børve skriv at lærarane på Øystese skule står bak innspelet, saman med fleire foreldre som har teke kontakt med FAU.
