– Vrak kan vera til hinder
Båten som sokk i Vikøyfjøra 18. februar, må fjernast og leverast til godkjent mottak.
Det krev rådmannen i Kvam, som etter halvannan månad har kravd at vraket vert fjerna.
Båten som sokk, måler 15 meter og har vore fortøydd i ei dobbe like utanfor ei flytebryggje ved Framnes Kristne Vidaregåande Skule. Han er av stål og har dieselmotor, og det er usikkert kor mykje diesel og olje det var om bord då båten sokk, skriv rådmannen. Kort tid etter at båten sokk, vart det påvist diesel i sjøen, og det vart lagt ut ei lense for å hindra ureining. Lensa ligg der enno.
Båten kan vera til hinder for andre båtar og til fare for omgjevnadene om han ikkje vert fjerna, meiner rådmannen.
Om båten ikkje vert fjerna innan 12. mai, vil heradet sjølv syta for å fjerna han. Heradet vil då krevja at båteigaren dekkjer utgifter, skade og tap som måtte oppstå, med heimel i hamne- og farvasslova og ureiningslova.
