Voss går lenger: Stengjer hotell og campingplassar

Hotell, campingsplassar og utleigehytter vert stengde på Voss vert stengde til og med 13. april. Kommunen meiner dei ikkje vil vera i stand til å retta seg etter dei nasjonale føringane om mellom anna å unngå uturvande reiser og å halda avstand.

Det går fram av ei pressemelding frå kommunen fredag. Styresmaktene har innført forbod mot overnatting i hytter og fritidsbustader utanfor heimkommunen.

– Voss ser at det likevel finst smotthol i regelverket som nokre søkjer å utnytta, heiter det i pressemeldinga.

Kommunen viser til at ein vil dempa presset på dei lokale helsetenestene, som ikkje er dimensjonerte for både innbyggjarar og tilreisande ei global krise.

Rådmann Arild M. Steine seier til HF at tiltaket fyrst ikkje var heimla i smittevernlova, men i forskrifta med forbod mot hytteovernatting. Dette stod seg ikkje, og forbodet er no heimla i smittevernlova.

Voss kommune melde torsdag at 23 koronasmitta er påviste.

Ordførar i Kvam, Torgeir Næss (Ap), kjenner ikkje til at campingplassar i Kvam er opne. Han seier heradet tidleg tok kontakt med eigarane for å oppmoda om stenging.