Vonar å sleppa omveg for å flaumsikra elva

Elva grev i elvekanten slik at jorda brotnar opp og rasar ned i elva. Dette ynskjer Aarhus å gjera noko med ved å mura med naturstein i elveskråninga på nordsida av elva. Det er snakk om ei strekkje på 245 meter på gard nummer 25/2 og gard nummer 26. Han har byrja på arbeidet, men det er for tida stillstand.

Noregs vassdrags- og energidirektorat (NVE) kravde at han søkte om konsesjon. Aarhus har søkt om fritak frå konsesjonskravet. Tida vil visa seg om han får løyve frå NVE til å halda fram, opplyser han.

Arbeid står på vent

Grunnen er «beinfrosen» no, og Aarhus har tenkt å venta til sommaren med å halda fram. 
Statsforvaltaren i Vestland uttalar i ei fråsegn at arbeidet i elva ikkje bør skje om vinteren når det ligg rogn og yngel i grusen.

Han minner elles om at vassressurslova stiller krav om kantvegetasjon langs vassdrag. Denne motverkar avrenning, gjev levestad for plantar og dyr, bidreg til erosjonssikring og har verdi for landskapsopplevinga.

Aarhus planlegg ikkje å setja ned planter langs elva. «Revegetering», som Statsforvaltaren snakkar om, vil ordna seg sjølv, meiner bonden.

Aarhus meiner det ikkje er fisk i elva lenger. Han trur at spreiing av lakselus er årsaka.

– Naudsynt, men ...

NVE skriv i eit innspel at forsterking av elvekanten er naudsynt med tanke på klimaendringar og kraftigare vassføring i elva. Muring med rundstein og tilbakelegging av jordsmonn i elvekanten er positivt for vegetasjonen, landskapsbiletet og omsynet til naturmangfaldet og fisket, påpeikar etaten. Området er ikkje eit utprega friluftsområde, slik at tiltaket ikkje råkar friluftsinteressene i særleg grad.

Ifylgje NVE er kantsoner mot vassdrag verdfulle landskapselement og gjev auka produksjon av botndyr og fisk i vassdraget. Etaten meiner at det må etablerast kantvegetasjon med tre og buskar langs elvebreidda for å armera og sikra elvekanten. Steindalselva og Movatnet har ei laks- og sjøaureførande strekning på 5,2 kilometer. Erosjonssikringa som er planlagd, kan redusera produksjonsevna til Steindalselva, meiner NVE.

Kva verknad tiltaket vil få for laks og aure, må utgreiast nærare, ifylgje direktoratet. NVE meiner at prosjektet kan får negative fylgjer for allmenne interesser. For at NVE skal kunna påleggja avbøtande tiltak, må prosjektet konsesjonsbehandlast.

Arealet er ikkje regulert. Dimed gjeld kommuneplanen. Rådmannen i Kvam herad meiner at planen i utgangspunktet opnar for muring i elvekanten. Tiltaket er unnateke byggjeforbodet i ei sone på 50 meter langs vassdrag. Sikring av jordbruksareal er i samsvar med målet med føremålet LNF – landbruk, natur- og friluft – med omsynssone for landbruk.

Rådmannen sende søknaden på høyring til NVE, Statsforvaltaren og fylkeskommunen.