Volontørar i vigør

Dei to har nemleg vore volontørar ved Hardanger fartøyvernsenter i Norheimsund.

– Me har gjort ting ein ikkje får gjort andre stader, seier Stumme.

Dei to har vore tettast knytte til hardangerjakta «Mathilde», men har også fått driva med andre ting. Mellom anna reipslaging, småbåtar og kaféteneste ved senteret.

– Eg likar best trebåtane, seier Stumme.

Det er også han som har mest erfaring med båt frå før av. Frank hadde ingen kunnskapar om båtlivet før ho kom til Kvam i september i fjor.

– No er eg heilt hekta, seier ho.

– Berre her

Båe to har gått på gymnas heime i Tyskland. Såleis har det maritime året vore eit friår. Til hausten skal Stumme halda fram ved fartøyvernsenteret som småbåtbyggjarlærling. Frank skal tilbake til Tyskland. Der ynskjer ho å verta fysioterapeut.

– Universitetet ligg heldigvis i nærleiken av havet, seier ho.

Stumme gler seg til å få læra endå meir om båtbyggjartradisjonane i Noreg. Han meiner det er nærast skammeleg at Tyskland ikkje har eit liknande tilbod.

– Me har eit slags fartøyvernsenter, men det vantar midlar til å driva, seier han.

Han meiner at volontørordninga har vore avgjerande for valet han tek vidare i livet. Sjølv om han hadde båterfaringa med seg frå heimlandet, så var det i Norheimsund han vart ekstra interessert.

– Eg trur dette er einaste staden i verda der volontørane får lov til å segla med ein båt som «Mathilde», seier han.

Godt mottekne

Dei to tyskarane har budd og levd ved fartøyvernsenteret alle dei ti månadene dei har vore i Kvam. Dei skryter av dei tilsette ved Hardanger fartøyvernsenter, som har teke godt imot gjestene.

– Dei har lært oss så masse, seier Frank.

Mellom anna har dei vorte inviterte med på spørjeleikar, tacokveldar og endåtil jolefeiring. Dei har også fått vera med på turar ut av Kvam. Mellom anna har dei fått besøka reiparbana i Kristiansund, som er monaleg større enn den fartøyvernsenteret sjølv har. Dei har også fått oppleva oppgangssaga i Herand.

– Det er ingen stader i verda som har alt dette samla, seier Stumme.

Utanom fartøyvern har dei fått oppleva nærområdet på fleire måtar. Det har vorte både fotturar, sykkelturar og seglturar med hekkbåten til «Mathilde».

– Det har vore mykje kjekkare enn det me kunne førestilla oss, seier Frank.

Dei to har også lært seg norsk, og gjennomfører intervjuet med lokalavisa på flytande norsk.

– Året har gått så fort, seier Frank.

Sjølv om ho no flyttar tilbake til Tyskland, kjem ho ikkje til å gløyma Kvam med det fyrste.

– Eg kjem tilbake, forsikrar ho.

Svært positivt

– Det har vore ei udelt glede å ha dei her, seier Sjur Tarjei Fykse.

Han har nyleg overteke stillinga som avdelingsleiar for museum ved Hardanger fartøyvernsenter. For senteret har dei to volontørane vore ein god ressurs det siste året.

– Dei er hjelpsame og lærevillige, seier Fykse.

Han fortel at fartøyvernsenteret har hatt volontørar jamleg dei siste åra. Dei fleste kjem gjennom den tyske organisasjonen Experiment. Til hausten kjem det ein ny volontør til senteret.

– Dei får prøvd mykje den tida dei er her, seier Fykse.