Vitra om skulekjøp, men ville ikkje seia prisen

Kvam herad har inngått avtale om kjøp av det som ein gong heitte Øystese gymnas. Det neste spørsmålet er om Øystese skule hamnar der for godt.

Den avtala kjøpesummen ville ikkje rådmann Anita Hesthamar røpa då ho orienterte formannskapet om den ferske handelen fredag 31. januar. Ifylgje henne vart kontrakten signert dagen før. Avtala overtakingsdato er 20. februar 2026.

Handelen hende vel fire månader etter eit vedtak i heradsstyret 25. september om å tinga om kjøp av eigedomen. Målet til fleirtalet var å sikra bygningane som mellombelse lokale når Øystese skule skal oppgraderast.

– Det har vore ein del fram og tilbake, så dette har teke noko tid, sa Hesthamar om prosessen etter vedtaket.

Vel å merka må den eventuelle handelen godkjennast av fylkestinget i møtet i mars for at han skal verta gjennomført. Årsaka er at det er sett grenser for kva administrasjonen kan gjera av eigedomssal utan politisk godkjenning, og at det er eit gap mellom taksten og bodet som er akseptert.

Kanskje løynd

Hesthamar sa altså ikkje den avtala kjøpesummen. Årsaka er at det kan henda at han skal haldast hemmeleg til vedtaket i fylkestinget er gjort, sidan forhandlingane formelt sett ikkje er over før då.

Rådmannen gjekk likevel langt i å spå at både summen og sakspapira til fylkestinget vil verta offentleg tilgjengelege. Ho spådde dessutan at fylkestinget kjem til å godkjenna handelen, på bakgrunn av tilbakemeldingar frå byråkratane.

Det ho kunne lova, var at heradet vil freista halda både forhandlingsfullmakta frå heradsstyret og dialogen med fylkeskommunen hemmeleg. Årsaka er at ho meiner at offentleggjering av til dømes rammene og framferda til heradet i tingingane kan skada forhandlingsposisjonen i andre forhandlingssaker.

HF bad onsdag om innsyn i alle dokument i saka, men hadde ikkje fått svar før helga. Fristen for å svara er fem dagar. Hesthamar varsla at avgjerda om offentleggjering av kjøpesummen vil verta teken raskt.

– Me må berre nett sjekka at ting er sånn som me trur, sa ho.

Permanent skule?

I septembervedtaket fekk rådmannen eit tilleggsoppdrag, nemleg å vurdera om skulen kan vera eigna som permanent skule. ABO Plan & Arkitektur har no fått dette oppdraget. Denne oppgåva har lege på vent medan tingingane om kjøp av eigedomen gjekk føre seg.

Vurderinga skal gjerast innan mars. Så vert det lagt fram ei politisk sak om vegen vidare, fortalde Hesthamar.