– Visjonen er ingen visjon

Visjonen til Kvam Energi AS, formulert i strategiplanen, er at verksemda skal «vera ei trygg, profesjonell og framtidsretta verksemd og ein pådrivar for lokal verdiskaping». Dette er ingen visjon, meiner Randa. Etter hans syn skal ein visjon vera noko å strekkja seg etter.

Styreleiar Gunnar Skeie er samd med gruppeleiaren i H, men understreka i generalforsamlinga 16. juni at det ikkje er enkelt å laga ein god visjon. Han vonar verksemda får tid til eit kreativt arbeid for å finna på noko betre.

– Mange verksemder har ikkje ein visjon, men det er flott å ha ein visjon om ein har ein god visjon, og det må vera vårt mål, sa Skeie.

Randa kritiserte også formuleringa om miljømål: «Konsernet skal ha ein positiv miljøprofil, og tilstrebe at aktivitetar fører til minst mogeleg skade på natur og miljø.» Randa etterlyser vektlegging av berekraft. Han fekk støtte av Kari Mostad (MDG), som meiner målet er litt for defensivt.

Gunnar Skeie påpeika at ein av dei overordna strategiane i planen er å auka lønsemda på ein berekraftig måte.

Trass kritikken var strategiplanen for 2020–2023 vedteken av generalforsamlinga utan at det kom framlegg om endringar.