Virus stoggar ikkje fredsdrøftingar

Symposiet, som set fred og konfliktløysing på agendaen, har i år tjueårsjubileum. Dei siste åra har det halde til i gamle Jonatunet, som no ber namnet Hardangerakademiet for fred, utvikling og miljø.

Eit fast innslag på symposiet er «State of the world-talen» til Johan Galtung (89), som var sentral i etableringa av symposiet i 2000. Galtung skal tala også i år, men denne gongen må tilhøyrarane oppleva forskaren og professoren via Skype. Han er nemleg i Spania for tida, og koronarestriksjonane gjer det uråd for han å koma til Jondal.

Dei same restriksjonane medfører plassavgrensingar for å sikra forskriftsmessig fråstand mellom deltakarane, så i år får berre dei 50 fyrste påmelde delta. I motsetnad til vanleg kan ikkje gjestene hjelpa seg sjølve og finna mat etter behov. Han må serverast.

Det er framleis ledige plassar att, fortel dagleg leiar og altmogelegmann Kristian Flo ved Hardangerakademiet. Folk både frå heile Noreg og utlandet kjem til Jondal for å delta.

Eleven kjem

Konflikthandtering og fredskultur er nøkkelord i 2020-programmet. Om ikkje Galtung sjølv dukkar opp i fysisk forstand, kjem eleven hans, Naakow Grant-Hayford, for å intervjua gamlelæraren. Grant-Heyford, som leier Galtung-instituttet nær Basel i Sveits, skal dessutan snakka om metodar for fredfull konflikthandtering, saman med pedagog Synnøve Faldalen.

Sistnemnde har utvikla eit konflikthandteringsprogram for barnehagar, skular og arbeidslivet gjennom Sabona-gruppa og har skrive ei bok om konflikthandtering.

Den tredje føredragshaldaren i år er Ingeborg Breines, som mellom anna har spela fleire viktige roller i Unesco og vore president i International Peace Bureau. Ho skal snakka om emna Gjennom kriser til fredskultur? og Naboer som venner– ikke fiender.

Birgitte Grimstad, ein dansk-norsk songar kjend frå mellom anna visegruppa Ballade, står for det kulturelle innslaget laurdag kveld. Ho byr på framsyninga Dyrenes og elementenes protestparade mot menneskenes dårskap, som tek eit oppgjer med korleis me handterer naturen. Flo har store forventingar til arrangementet. Han fortel at vona er å få godt vêr, slik at framsyninga kan visast i hagen og vera open for mange fleire.

Elles står mellom anna yoga, bading, song, paneldialog og tur til Folgefonna på programmet.

Tapar inntekter

I haust skipar Hardangerakademiet til kurs i både økosofisk naturnærvær og økosofisk landbruk i lys av økologisk økonomi. Dessutan vert det eit kurs rett etter symposiet.

Kristian Flo held til i Bergen, men er det meste av tida i Jondal og kosar seg i det gamle bygget. Han hadde lenge tenkt å reisa på symposiet, men det hende ikkje før kjenningen Vidar Rune Synnevåg fekk han med i 2014. Sidan har han engasjert seg i styre og stell og vorte ei sentral brikke. Ingen av dei involverte i drifta ofrar tida for å verta rik, forsikrar Flo.

– Dette handlar om ideologi, seier han.

Når HF møter han, tronar han einsam i det store bygget. Breførarane som leiger senger i sommar, har reist for dagen. I lokala har han rikeleg å hengja fingrane i, for eit bygg som det gamle Jonatunet krev sitt. Kontinuerleg går det føre seg oppussing.

Flo seier akademiet er hardt råka av covid-19. Vanlegvis leiger ein ut rom til ymse skilag som gjestar Folgefonna, men i år er trafikken monaleg redusert. Det dårlege året kjem etter to år med kort sesong på Fonna som følgje av snømangel. Flo stipulerer eit tap på på fleire hundre tusen kroner i år, noko som har fått styret til å vurdera å setja i gang med Airbnb-utleige av rom.