Vinn, vinn for utflytta ålvikarar
Butikkinnehavar Andrea Linga trong ein nettbutikk. Student Erling Aalvik trong nokon som trong ein nettbutikk.
Aalvik studerer marknadsføring og merkevareleiing på Høyskolen Kristiania i Oslo. Då han og studiekamerat Fredrik Rørstad fekk i eksamensoppgåve å etablera ein nettbutikk, fekk han ein idé.
– Den første som dukka opp i hovudet mitt, var Andrea. Eg kjende til henne frå Ålvik og visste at ho driv interiørbutikk på Nesodden. Difor slo eg på tråden og spurde om me kunne laga nettbutikk til henne. Det fekk me, fortel Aalvik.
Arbeidet gjer dei heilt gratis.
– Det var berre å hoppa i det
Butikken til Linga heiter Draumefangst verkstad og butikk. Den ligg i garasjen hennar på Nesodden. Ho starta butikken i desember 2017, og har lenge ønskt seg ein nettbutikk.
– Det at eg no får nettbutikk, gjer at eg lettare når ut til alle Facebook-følgjarane mine som bur rundt i landet. Mange har spurt om eg ikkje skal starta nettbutikk. Då denne moglegheita dukka opp, var det berre å hoppa i det, seier ho.
– Mykje å halda styr på
Aalvik fortel at det å starta ein nettbutikk er tidkrevjande, men ikkje så vanskeleg.
– Utfordringa er at me har 30 dagar på oss til å gjera noko me aldri har gjort før. Det er mange element som må på plass og mykje me må læra oss på kort tid, seier han.
Nettbutikken opnar 1. juni og skal ha prøvedrift til 30. juni. I denne perioden er han open for handel for alle som er interesserte.
– Dersom Andrea ønskjer å gå vidare med dette, vert det ei offisiell lansering seinare, seier Aalvik.
