Vinforskar trur på hardangersideren
Den franske vinforskaren Guillaume Antalick vitja Siderfestivalen. Han deltek på eit prosjekt som mellom anna samanliknar norsk og fransk sider.
Antalick stod på standen til Norsk institutt for bioøkonomi (Nibio). Han er ekspert på aroma og deltek i det internasjonale prosjektet SiderKultur — Uncorking Wine & Cider Typicvality, som mellom anna Siderklynga i Hardanger, Hardangerrådet, Nibio og matforskingsinstituttet Nofima er med på. Målet er å kartleggja smaksskilnader mellom sider laga på ulike stader.
Sjølv om franskmennene er meir kjende for å produsera vin enn sider, fortel Antalick at det vert produsert mykje sider i nokre franske regionar.
– Det er stor skilnad på sider frå Hardanger og sider frå Frankrike. Du kan nesten seia det er heilt ulike produkt. Hardangersideren har truleg større moglegheiter på den internasjonale marknaden, medan dei franske sidertypane er meir komplekse og appellerer meir til kjennarar, seier han.
Han trur hovudårsaka til skilnaden er råvarene.
– I Hardanger lagar de sider av eple som er laga for å verta etne. I Frankrike brukar ein mindre og syrlegare eple. I Frankrike er det vanlegare å laga sider der ein blandar mange epletypar. I Hardanger vert ofte sidrane laga av éin type eple. Dessutan gjer sjølvsagt klima at franske og norske eple smakar ulikt, seier han.
Antalick er imponert over det han har opplevd i Hardanger.
– Mykje har skjedd på siderfronten i Hardanger dei siste åra. Eg trur siderprodusentane i Noreg er på rett spor, og det lover godt for framtida til bransjen, seier han.
