Ville utsetja sal av næringstomt
Fortidsminneforeningen Hardanger meiner at bruken av ei sentrumstomt i Jondal må vurderast i den varsla sentrumsplanen.
Dei siste åra har det vore uklart kven som skal få kjøpa næringstomta som ligg bak gamle Jondal Stål og «Pilaverkstaden» i Jondal sentrum. Rett før kommunestyret handsama saka i desember, sende lokallaget i foreininga ein merknad til Ullensvang kommune.
Laget skriv at Jondal sentrum er eit av dei mest verdifulle og bevaringsverdige bygdesentra i fylket og nasjonalt. Bygda har historiske bygg og rik kulturarv, og har ressursar og kvalitetar som må takast vare på for seinare generasjonar, ifylgje lokallaget. Difor må saker knytte til Jondal sentrum handsamast med særleg omsyn til kulturminneverdiane og kulturarven som verdiskapar og identitet, heiter det i brevet.
Ungdomshuset ligg i nærleiken av tomta. Huset er teikna av arkitekt Torgeir Alvsaker. I år skal hans innsats som arkitekt minnast fleire stader, står det i brevet.
Laget påpeikar at saksframlegget frå rådmannen ikkje seier noko om kulturminneverdiane i Jondal eller om sentrumsområde som er regulerte til vern. Ifylgje lokallaget ligg det fire eldre hus i nærleiken som er regulerte til vern.
Lager skriv at kommunen med den nye sentrumsplanen, kulturmiljøplanen for Ullensvang og arealplanen skal finna gode løysingar for Jondal sentrum. Foreininga meiner salet må sjåast i samanheng med dei nye planane.
Det var fleirtalet i kommunestyret samd i. Ullensvang kommunestyre vedtok 18. desember å stoppa salsprosessen og vurdera saka igjen i samband med arbeidet med sentrumsplanen.
Tidlegare hadde kommunestyret vedteke å selja tomta til Hardanger Maskin AS, som gjekk konkurs. Det nye selskapet til innehavar Tore Eiken vona å få overta lovnaden om å få kjøpa eigedomen, men slik gjekk det altså ikkje.
Les også:
