Ville ikkje uttala seg om Syria-mødrene
Heradsstyret i Kvam vil ikkje blanda seg bort i internasjonal politikk.
SV, KrF, MDG og R stod bak framlegget om å senda ein resolusjon der ein tek til orde for mellom anna at Noreg hentar heim fire kvinner med fire born internerte i leirar i Syria. Kvinnene har vore saman med IS-krigarar. Partia meiner at borna ikkje skal straffast for ugjerningane til foreldra gjennom radikalisering i leirane.
Saka vart teken opp på kvinnedagsarrangementet i Kvam 8. mars.
Ordførar Torgeir Næss (Ap) argumenterte mot å handsama interpellasjonen, og fekk støtte av tilstrekkeleg mange til å avvisa han. Ap, Frp, H og Stig Aase (Sp) røysta mot handsaming. Det held at minst ein tredel av dei 27 lemene protesterer.
Næss er samd i innhaldet i interpellasjonen, men meiner saka ikkje høyrer heime i lokalpolitikken av di det ligg til regjeringa å handsama utanriks- og statsborgarskapspolitikk.
– Slike uttalar arbeider ein best med internt i dei respektive partia. Personleg ynskjer eg ikkje å opna for at heradsstyret handsamar resolusjonar av dette slaget, sa han.
Han viste til at årsmøtet i Vestland Ap i mars samrøystes vedtok ei liknande fråsegn. Det meiner Geir Madsen (SV) er ei aldri så lita sjølvmotseiing.
– Eg ser ikkje skilnad på om Vestland Ap, Kvam Ap eller partia her sender ei oppmoding. Det går på viljen til å markera og pressa på, sa han, men altså til ingen nytte.
Næss svara ikkje på påstanden i møtet, men seier til HF at eit fylkesparti er noko heilt anna enn eit fylkeskommuneparti. Fylkespartia blandar seg såleis bort i langt meir enn berre fylkeskommunal politikk, mellom anna i den generelle politikken til morpartiet.
