Vil yta sin reiselivsskjerv

I alle fall tilrår rådmann Ole-Jørgen Jondahl ei slik løyving, i tråd med fordelingsnøkkelen som Hardangerrådet har skissert. Framlegget hans er å henta pengane frå disposisjonsfondet og å stilla eit vilkår om at dei andre kommunane løyver tilskot.

Som HF har skrive før, vantar hardingane ein regional strategi for reiselivet. Visit Hardangerfjord har tidlegare gjennomført eit forprosjekt som vart presentert hausten 2022.

Manglar «sertifikat»

Tilrådingane om hovudaktivitetar i arbeidet med strategien er i hovudsak ført vidare i planarbeidet det vert søkt om stønad til.

Rådmannen framhevar at Hardanger vatnar sertifisering som berekraftig reisemål, ei ordning Innovasjon Noreg administrerer. Eit kriterium for å verta sertifisert, noko turistane visstnok legg vekt på når dei vel reisemål, er at reisemålet har ein fleirårig og brei plan eller strategi for reiselivsutvikling som er utvikla i ein involverande prosess og har auka berekraft og god besøksstyring som mål. Strategien må dessutan fylgjast opp med ein handlingsplan som vert rullert årleg.

Både fylkeskommunen og Sparebankstiftinga Hardanger har løyvt 450.000 kroner og til arbeidet med strategien. Sparebankstiftinga i Kvinnherad avslo derimot søknaden om stønad. Samla kostnad er 1,9 millionar kroner. Millionen som manglar, er altså kommunane oppmoda om å finansiera. Etter fordelingsnøkkelen skal Kvam yta 200.000 kroner.

– Sjå under eitt

Ifylgje rådmannen har kommunen så smått sett i gang arbeidet med ein reiselivsstrategi for berre Ullensvang.

– Erfaringa er at arbeidet vert krevjande utan ein felles, overordna strategi som set retning for utviklinga, då turismen ikkje fylgjer kommunegrensene, skriv rådmannen.

– Ved å sjå heile regionen under eitt kan ein leggja til rette for å fordela turiststraumen mellom kommunar og attraksjonar i regionen, og slik unngå overbelasting på mellom anna natur, lokalsamfunn og innbyggjarar, heiter det vidare i saka.

Rådmannen viser til at politikarane seinast i vedtaket om budsjettet for i år vedtok at kommunen skal laga ein strategi for å leggja til rette for utvikling og heilårsturisme. Kommunen er med på eit fylkeskommunalt prosjekt som gjeld berekraftig besøksforvalting, noko det òg vert arbeidd med i Herand Bygdelag.

– Ettersom det er ulike initiativ på ulike stader og ulike nivå, kan det vera føremålstenleg å jobba litt på plass, slik at strategien som ferdig produkt er godt forankra og best mogeleg tek opp i seg ulike perspektiv og nyansar. På denne måten kan strategien og arbeidsprosessar vera ein viktig ressurs inn mot arbeidet med lokale besøksforvaltingsplanar og eit godt verktøy for å finna gode løysingar til dei utfordringane ein står overfor både på enkeltdestinasjonar og reisemål, og i kommunar og region som heilskap, utbroderer rådmannen.

Ikkje i Kvam heilt enno

Formannskapet i Ullensvang drøftar saka 23. januar. Kommunestyret tek avgjerd 5. februar.

I Kvam står ikkje saka på sakskartet til komande møtebolk. Ordførar Torgeir Næss (Ap) seier til HF at han reknar med at saka vil koma opp i mars. Administrerande direktør Andreas Skogseth i Visit Hardangerfjord skal orientera om saka i formannskapsmøtet 31. januar, fortel Næss

Kvemmingane har som praksis at dei ikkje handsamar ei sak i det same møtet som ein part har hatt ordet for å snakka om den aktuelle saka.