– Vil verta klart til sesongen

Sist det var «liv» i sjøhuset, hyste det butikk og venterom. No er det ein pub og eit serveringslokale med kjøken som er i kjømda. Bygget vil også ha dører ut mot hotellhagen.

Korkje detaljar eller plank er ferdig spikra, men hotelldirektør Marie Skutlaberg Kjøsnes er positiv. Ho satsar på snart å kunna tilby både hotellgjester og innbyggjarar noko nytt.

Same stilen

Det har vore trist å ha eit bygg med den historia og plasseringa ståande tomt, synest hotelldirektøren. No håpar ho at hotellet kan bidra til å skapa meir liv i sentrum. Om alt går etter planen, ser Kjøsnes føre seg å kunna opna dørene i løpet av mai. Då skal «alt» vera nytt.

I desse dagar jobbar røyrleggjarar i bygget. Også det elektriske lyt bytast ut. Vidare skal taket leggjast på nytt, kledningen bytast og nye vindauge på plass, for å nemna noko. I den øvste etasjen skal det byggjast leilegheiter for tilsette ved hotellet.

– Me konsentrerer oss om hovudetasjen fyrst. Planen er å verta ferdig før sesongen, men eg torer ikkje seia ein dato, seier Kjøsnes.

Bygget vert i same stilen som før, fortel ho. Hovudetasjen vert delt i to og får to inngangar, med moglegheit for å opna opp mellom dei to delane. Puben er planlagd i lokalet ned mot sjøen, medan serveringslokalet vert opp mot fylkesvegen.

– Må prøva oss fram

Konseptet i lokala er ikkje fastsett enno, fortel Kjøsnes. Heller ikkje interiørdetaljar veit ho veldig mykje om. Planlegginga føregår i Oslo. Men det direktøren har fått presentert til no, ser veldig bra ut, meiner ho. Det vert lyse lokale i attkjenneleg «Thon-stil».

Målet er å byggja eit konsept der hotellet kan samla alt på ein plass, og samstundes senka terskelen for lokale. Med dører ut mot hotellhagen håpar Kjøsnes at fleire kan nyta utsikta.

– Gjestene skal kunna sitja ved eit bord, tinga mat og drikke, få servering og betala. Eg trur det vert eit veldig bra tilskot til Norheimsund sentrum. Det er jo verdas beste utsikt, seier direktøren.

Opningstidene er ikkje fastsette. Om det vert heilårsdrift, står òg att å sjå.

– Me må prøva oss litt fram, trur eg, seier Kjøsnes.