– Vil verta internasjonale
Kjetil Melstveit (21) og Herman Skeie (21) frå Øystese har starta klesmerket «Advanced».
– Det store målet er å koma oss ut i verda og bli internasjonale, men då må me først bli kjende i vårt eige område.
Det heile starta med at tre kompisar ville starta ei eige bedrift. Tredjemann kunne diverre ikkje vera med, då han hadde korkje tid eller pengar til overs. No har to av dei – Kjetil og Herman – allereie hatt to dropp med det nye klesmerket.
– Me begge er svært interesserte i klede og design, så då vart det eit lett val, seier Herman.
Gjekk inn med pengar
Begge har fulltidsarbeid utanom og gjekk inn med eigenkapital i verksemda. Herman jobbar i rotasjon med fire veker fri, medan Kjetil jobbar frå måndag til fredag. Såleis er det Herman som styrer mest med det økonomiske, men alt i alt er arbeidet jamt fordelt.
Det første droppet inneheldt 70 varer og vart utselt. Til no er det selt om lag like mange produkt i dropp nummer to, som er dobbelt så stort.
Kundane er folk i alle aldrar. Klesmerket har varierte produkt – nokre med mykje design og andre med mindre – for å treffa både yngre og eldre. Før jul var mykje familie kundar i samband med julegåvekjøp.
Håpar på eigenproduksjon
Karane designar genserane sjølve. Inspirasjon finn dei overalt.
– Me har til og med eit design der me har henta inspirasjon frå Folgefonna til eit av produkta våre, seier Skeie.
Verksemda D2 syr designen på og lager genserane. D2 lagar klesmerke for andre store profilar, som Linnea Løtvedt, Kaizers Orchestra og Morten Abel.
– Me håpar at me kan bli så store at me kan laga kleda våre heilt sjølve, ha eige lokale og få folk i arbeid for oss. Det hadde vore det kjekkaste, men det kostar, seier Kjetil.
Journalistane er mediefagselevar ved Framnes Kristne Vidaregåande Skule. Artikkelen er skriven som ein del av undervisinga. Red.
