Vil vekkja «Nistagato» frå dvalen

Laget har søkt om 185.000 kroner i kommunal stønad til ein plan for ei satsing på «Nistagato», som på kartet ber namnet Nedstegata. Laget vil stilla med like mykje sjølv.

Gata, som er ein blindveg, vart ikkje rusta opp som del av miljøgateprosjektet. Saman med torget kan ho verta eit spanande område for verksemder, festivalar og arrangement, ifylgje søknaden. Målet er auka trivnad og å sikra og skapa arbeidsplassar.

– Ein kan tenkja seg eit område tilrettelagt som gatetun, delvis overbygt og tilpassa aktivitetar som julemarknad, torgdag og festivalområde, skriv Jahn Valland Tolo i næringslaget.

Laget har med seg grendeutvalet i prosjektet. Dei to utvala er med i ei prosjektgruppe saman med huseigarar og privatpersonar.