— Skal setja opp not

Det opplyser Svein Valland Laupsa, innsatsleiar i Vest politidistrikt, på pressekonferansen klokka 15.

Søket i Tokagjelet vart sett i gang etter at det var gjort nye observasjonar i elva som truleg kan knytast til hendinga. Redningsmannskap held framleis på i juvet. I aksjonen vert det nytta undervasskamera, seier Laupsa.

— Undervasskamera vert nytta for å leita. Parallelt med at gjenstandar vert henta opp frå elva vil redningsmannskapet gjennomføra søk under vatnet, seier innsatsleiaren.

Ifylgje Laupsa skal det setjast i gang dronesøk seinare i dag.

— Me skal gå i gang med eit dronesøk med mannskap frå Bergen brannvesen. Dei skal søkja i område der det er vanskeleg å koma til med helikopter og til fots, seier Laupsa.

Set opp not

Innsatsleiaren opplyser at Lingalaks AS skal koma og bidra med not.

— Lingalaks vil setja opp ei not som skal forsøkja å fanga gjenstandar som kjem med elva og ned i Movatnet. Målet er at ho i verste fall skal hindra at dei sakna hamnar ut i Hardangerfjorden, seier Laupsa.

Han legg til at det er viktig å få gjort mest mogleg medan det er opplett og vindstille. I morgon og torsdag er det meldt meir regn.

Søkjer etter omkomne

— Fokuset er framleis å finna dei tre sakna personane. Samstundes har det gått så lang tid at me er over i ein ny fase, søk etter omkomne, som tyder at det er lite eller inkje sannsyn for å finna personane i live, seier Laupsa.

Søket vart redusert i omfang måndag kveld. Laupsa fortel at frivillige har vore ute på observasjon på aktuelle stader i natt.

Parallelt med aksjonen i Tokagjelet vert det gjennomført søk i Movatnet.

Les også:

Nye observasjonar

Tysdag morgon var det gjort nye observasjonar i Tokagjelet, i nærleiken av fossen som personane truleg har falle utfor. Laupsa ville ikkje gå nærare inn på desse.

Observasjonane førte til at ei elveredningsgruppe frå Røde Kors og alpine redningsgrupper vart firte ned i eit korg frå ein kranbil for å undersøkja området nærare, opplyste Laupsa.

Det er framleis krevjande arbeidstilhøve med høg vassføring i eit rasfarleg område, seier Laupsa. Difor må det heile tida vurderast korleis ein kan vareta tryggleiken til dei som arbeider i området.

Ifylgje Laupsa er det ikkje planlagt meir dykking etter det fyrste, resultatlause søket i Movatnet måndag kveld.

Opne kyrkjer i Askøy

Ordførar i Askøy, Siv Høgtun, var til stades på pressekonferansen tysdag føremiddag.

Ho opplyste at kommunen har opna eit senter for pårørande i Strusshamn. Det vert også open kyrkje ved Strusshamn og Tveit. Prestar, diakonar og helsepersonell vil vera til stades.

— Kommunen si hovudoppgåve er å vareta pårørande, sa Høgtun.

Fylkesvegen ved Tokagjelet vert stengd så lenge søket held fram.