Vil tilby fjern- og nærundervising
Hardanger og Voss Næringshage AS ber Kvam herad opplysa om kommunale lokale som kan leigast eller lånast for skiping av kurs.
Det skriv forretningsutviklar Mina Evjen til heradet. Hardanger og Voss Næringshage arbeider nemleg med eit prosjekt for kompetanseheving i regionen. Hovudmålet er å etablera eit kompetansesenter for Voss, Hardanger og Kvinnherad som får statleg finansiering seinast frå 1. januar.
Målgruppa er i hovudsak folk som er i jobb og som ynskjer etter- og vidareutdanning, men også dei som står utanfor arbeidslivet og som ynskjer å arbeida.
Næringshagen undrar om heradet har lokale med videoløysing som det er mogleg å få låna eller leiga.
Hagen er til stades i kommunane Kvam, Voss, Ulvik, Kvinnherad, Ullensvang og Eidfjord. Seks ulike kurs er planlagde. Kvam herad er med og finansierer prosjektet. Om, og eventuelt når, det vert mogleg med varig statleg finansiering, er ikkje avklara frå Direktoratet for høgare utdanning og kompetanse. Næringshagen jobbar førebels med prosjektfinansiering.
