Vil tenkja meir langsiktig i flyktningpolitikken

Det meiner rådmannen, som legg saka fram for dei folkevalde i komande møtebolk.

Framlegget går ut på å stilla 15 busetjingsplassar til disposisjon for familiar og einslege vaksne i år, og 24 plassar for einslege mindreårige i 2024–2027. Dessutan vil rådmannen gje skular som mottek flyktningar utan skulebakgrunn, eit eingongstilskot like stort som barnehagetilskotet.

Han føreslår å løyva 100.000 kroner til ei ordning der lag og organisasjonar kan søkja om pengar til tiltak og arrangement som fremjar integrering.

I perioden 2020–2023 har kommunen busett 341 flyktningar, av desse 11 einslege mindreårige. 205 av dei kom i 2022. Opphavleg vedtak for perioden var eit monaleg lågare tal: 140.

Rådmannen påpeikar at det tek tid å byggja ned kapasiteten og krevja store ressursar å byggja opp att fagmiljø. Difor tek han til orde for meir langsiktig planlegging. Det er bakgrunnen for å føreslå eit samla måltal for dei neste fire åra.

– Dette vil leggja til rette for ei meir stabil og planlagd busetjing som kan ta høgd for ulike kapasitetsvurderingar, skriv han.

I fjor vart kommunen beden av styresmaktene om å busetja 170 flyktningar. Det vart busett 80, i tråd med vedtaket i kommunestyret i juni, pluss 6 einslege mindreårige. Styresmaktene reknar med at det vil koma mange fleire frå Ukraina til Noreg.

Rådmannen meiner busetjinga dei siste åra har vore vellukka, men at det ikkje er berekraftig å busetja så mange som i 2022 kvart år. Årsaka er omsynet til dei kommunale tenestene og press i bustadmarknaden.

Flyktningar er busette i alle bygder så nær som Røldal. I saka tek rådmannen til orde for å busetja i alle «dei større bygdene». Han vedgår at det har vore utfordringar med kapasitet i skule og barnehage somme stader, men vil kontinuerleg vurdera kvar det er best å busetja.

Han viser til at over halvparten av dei som avslutta introduksjonsprogrammet, gjekk over til arbeid eller utdanning.

Dei største gruppene med innvandrarar i Ullensvang kjem frå Ukraina, Polen, Thailand, Syria og Tyskland. Ved inngangen til 2023 var 14,1 prosent av innbyggjarane innvandrarar.

Utval for kultur og levekår drøftar saka 23. januar, før kommunestyret tek avgjerd 7. februar.