Vil ta tak i gateløp og ledige lokale
Øystese Utvikling AS vonar på meir pengar til nye satsingar for å utvikla bygda.
I ein ny søknad om stønad frå kraftfondet skisserer føretaket tre prosjekt for å utvikla Øystese:
• 24. oktober skipar føretaket til Øystesekonferansen, med mellom anna bygging av husvære som tema.
• Visualisera av gateløpet frå rundkøyringa til Kvam Fruktlager, med mål om å gjera det trygt og innbydande.
• Kartleggja ny bruk av lokala til Kvam vidaregåande skule når skulen vert flytta til Norheimsund om eit par år.
Mest – 150.000 kroner – er visualiseringa budsjettert til å kosta. Samla kostnad er 210.000 kroner i 2023 og 2024. Vona er at Kvam herad vil finansiera halvparten.
Arbeidet byggjer på den såkalla masterplanen som vart utarbeidd i fjor, finansiert med 50.000 kroner frå kraftfondet. Vona var å få delta i det statlege Gnist-programmet, men prosjektet i Kvam nådde ikkje opp.
Dagleg leiar i Øystese Utvikling er Hans Jørgen Andersen, som har ei stilling på 20 prosent. Aksjekapitalen på 640.000 kroner som 33 aksjonærar skaut inn ved etableringa, er nytta til drifta, og selskapet treng anna finansiering.
