Vil ta på seg kostnad

I praksis inneber det at Kvam herad legg ut 0,9 millionar ekstra kroner, i tillegg til det ordinære tilskotet og eit ekstraordinært tilskot på totalt 3,1 millionar kroner. Samla yting vert i så fall 4 millionar kroner i år.

Grunngjevinga for ynsket, som vart fremja munnleg av Hardangerbadet i eit dialogmøte med Kvammabadet KF, er ymse auka kostnader og ei misforståing. Hardangerbadet skal ha trudd at heradet ville dekkja kostnaden med føretaksdrifta i år i tillegg til det ekstraordinære tilskotet. Ein føresetnad i driftsmodellen har frå starten vore at Hardangerbadet skulle betala for drifta, som i år vert ekstra kostesam på grunn av omfattande arbeid med ny drifts- og samarbeidsavtale.

Selskapet har spådd eit underskot i drifta av badeanlegget på vel to millionar kroner i år. Dekkinga av KF-utgiftene inneber ikkje at dei 36 private «underskotsgarantistane» slepp å betala for seg i år. Desse må såleis fyrst punga ut med ein million kroner, før Kvam herad eventuelt legg ut. I tillegg må majoritetseigaren av Hardangerbadet AS, Hardangerbadet Eigedom AS, stilla opp for å dekkja resten av tapet.

Saka førte ikkje til debatt i formannskapsmøtet 7. november eller heradsstyret 14. november. Vedtaket var såleis samrøystes.