Anne Lise Breievne og Håkon Berge selde ymse drykk og syltetøy under Siderfestivalen i Øystese i fjor haust. No ynskjer dei å produsera og selja alkohol heime i tunet på Breievne. Fleire andre gardar har fått slike løyve i Kvam før.

Vil skjenkja øl og vin på gard

Breievne Gard ynskjer løyve til både å selja og skjenkja alkohol.

Sigbjørn Linga
Bladstyrar
Publisert

Rådmannen er positivt innstilt til båe delar, og tilrår dei folkevalde å gje løyva til garden mellom Oma og Skjering.

Søknaden om skjenkjeløyve gjeld eit område på 16 rutemeter i stabburet på tunet, der det er plass til åtte gjester. Driftskonseptet er gardsturisme med smaksopplevingar og historieforteljing. Søkjaren deltek i eit kraftfondsstøtta reiselivsprosjekt som skal utvikla nye produkt.

Søkjaren ynskjer løyve for skjenking av drykk med inntil 22 prosent alkohol frå klokka 12 til 02, og rådmannen har ingen innvendingar.

Salsløyvet inneber produksjon og sal av like sterk drykk, i praksis sider og mjød. Salet kan føregå frå klokka 08 til 20 på kvardagar og klokka 08 til 18 på laurdagar og dagar før heilagdagar, ifylgje tilrådinga. Planen er å selja i eit marknadstelt på tunet.

Søknadene vert vurderte av formannskapet 8. juni og heradsstyret 14. juni.

økonomi sosiale tilhøve rus politikk omastrand nyhende kvam herad
Laga med Labrador CMS