– Vil skjenkja i Sjøhuset

I dag har hotellet skjenkjeløyve i heile hotellet, hotellhagen og eit lite areal på nedsida av «strandpromenaden» mot fjorden.

Søknaden om endring kan rådmannen i utgangspunktet avgjera på eiga hand, men ho har valt å leggja saka fram for heradsstyret. Årsaka er nærleiken til torget og det at Sjøhuset ikkje har vore omfatta av skjenkjeområdet tidlegare, skriv ho i saksutgreiinga.

Ifylgje søknaden planlegg hotellet pub og serveringslokale i fyrste etasje av Sjøhuset. Etasjen er på om lag 160 kvadratmeter. Opningstidene for puben vil verta styrte av belegget på hotellet, skriv søkjaren. Serveringslokalet vil dessutan verta nytta til lukka arrangement og til lunsj- og smårettservering. Inn- og utgang vert mot hotellhagen, ikkje mot torget.

Rådmannen og formannskapet – minus KrF – tilrår å godkjenna endringa. Eitt av dei føreslegne vilkåra er at hotellet skal sikra at gjestene ikkje skal ta med seg alkohol til den offentlege gangvegen.

Jostein Moldsvor (KrF) argumenterte mot utvidinga av skjenkjeområdet, og meiner det er for mykje skjenkjeareal i Norheimsund frå før. Han viste til målet om redusert alkoholkonsum då saka vart drøfta i formannskapsmøtet 7. mars. Ingen andre parti greip ordet før dei stilte seg bak søknaden.

Heradsstyret avgjer saka 14. mars.