Vil sikra fleire jolemat

– Ingen born skal sitja på jolaftan og ikkje ha mat, seier Andreas Jacobsen.

Han er leiar i Øystese Røde Kors. Dei siste vekene har han motteke fleire førespurnader frå folk som strevar økonomisk og treng hjelp til jolemat. Jacobsen har vore leiar i laget i seks år, men har aldri opplevd å få slike førespurnader tidlegare.

– Det viser at Noreg går i heilt feil retning, seier han.

No vil Raudekrossen strekkja ut ei hand. Med på laget er Coop Extra i Øystese.

Må stola på folk

Raudekrossen vil, i samarbeid med Coop Extra, gjera klar matkassar til dei som treng dei mest. Kassane vil innehalda mat til jolemiddagar, men også ymse pålegg.

Høge straumprisar og ein kraftig auke i matprisar er truleg noko av grunnen til at fleire strevar økonomisk før jol, ifylgje Jacobsen. Men det å be om hjelp sit truleg langt inne hjå enkelte.

– Eg trur ikkje det er kjekt for mannen i gata å be om støtte til mat, seier han.

– Kven kan koma og henta matkassar?

– Me stolar på folk – at dei som kjem og hentar mat, er dei som treng hjelp. Så enkelt må me gjera det, seier Jacobsen.

Likevel understrekar han at det er barnefamiliar som er hovudmålgruppa.

– Ta kontakt!

Trine Flotve er butikksjef på Coop Extra i Øystese. Då ho fekk telefon frå Jacobsen, var ho positiv med det same. Det er ein kjempegod idé å hjelpa dei det gjeld. Så er det kjekt å kunna bidra, seier ho.

Akkurat kva bidraget vert, og korleis det skal gjerast, er framleis uvisst. Det kjem an på kor mange personar det er snakk om.

– Me er veldig innstilte på å bidra der me kan, seier Flotve.

Dei som treng hjelp, må ta kontakt, seier Jacobsen, anten med Raudekrossen i Øystese direkte eller via organisasjonen Betre Kår - Kvam.

Kor mykje pengar Raudekrossen brukar på prosjektet, ynskjer ikkje Jacobsen å uttala seg om, men han seier det er mykje pengar for Raudekrossen.

– Ikkje lågterskel

Jacobsen meiner at systemet for å få matstønad er for dårleg, og for dårleg opplyst. Sjølv måtte han ta fleire telefonar for å finna ut kvar folk kan få tak i mat. I tillegg er det naudsynt å søkja gjennom Nav for å få hjelp. Det kan ikkje kallast eit lågterskeltilbod, hevdar han.

Han synest at kommunen burde ha sett i gang eit lågterskeltilbod og kome ut med ein sum til dei som slit litt ekstra.

Tidlegare i år sytte heradsstyret for at dei som får sosialstønad får 3.500 kroner ekstra denne månaden.

– Har Kvam herad vurdert andre særskilde tiltak for fattige?

– Me har ikkje fått innspel om det før budsjettvedtaket eller gjort vurderingar kring det, nei, seier ordførar Torgeir Næss (Ap).

Budsjettet vart vedteke torsdag 8. desember. I Ullensvang kommune vedtok kommunestyret nyleg før å løyva 100.000 kroner frå dispensasjonsfondet til økonomisk vanskelegstilte i kommunen.

– Kva tenkjer du om initiativet til Raudekrossen?

– Det er jo supert om det er behov for det. Eg skal bringa vidare innspelet, seier Næss.