– Vil sikra daglegvaretilbod
Kvam Høgre føreslår å prioritera verksemder som ynskjer å driva daglegvarebutikk i Ålvik eller Tørvikbygd.
Partiet meiner at Kvam herad i neste runde med tildelingar frå kraftfondet skal prioritera slike søknader. Håpet er at det kan vera den oppmuntringa som trengst for at nokon skal tora å prøva, skriv gruppeleiar Arne Sandven i ein e-post til HF.
Coop Marked-butikken i Tørvikbygd vert lagd ned ved nyttår etter ti år med underskot. Parallelt planlegg Coop Hordaland å overføra drifta av butikken i Ålvik til Norsk Butikkdrift, eit dotterselskap av Coop Norge med kring 150 butikkar. Det inneber omprofilering og drift etter franchisemodellen, så sant ein franchisetakar dukkar opp.
Føretak som ynskjer å driva daglegvarebutikk i Ålvik eller Tørvikbygd, skal ha ein føremon, meiner H, som vil bruka inntil 500.00 kroner fondskroner på føremålet.
– Det er eit politisk signal til rådmannen om kva me vil prioritera høgast om aktuelle søkjarar melder seg, skriv Sandven.
Om berre eitt føretak søkjer, kan det i beste fall få heile potten om søknaden elles er i samsvar med vedtektene for bruk. Kraftfondet kan ikkje dekkja løpande driftsutgifter.
Framlegget er eit tilleggspunkt til 1. tertialrapport, som heradsstyret handsamar torsdag 20. juni.
