– Vil sikra beredskapen

Det kjem fram i sakspapira til møtet i planutvalet i Kvam onsdag 8. mai. Rådmannen meiner at hytta vil sikra beredskapen og hjelpekorpset sine interesser i Hamlagrø, og tilrår dei folkevalde å gje Raudekrossen dispensasjon frå både plankravet og byggjegrensa.

– Det er viktig å leggja tilhøva til rette for Øystese Røde Kors Hjelpekorps når ein har moglegheit til å få seg ei ny lagshytte, skriv ho i saksutgreiinga.

250 kvadratmeter

Hjelpekorpset meiner at den eksisterande hytta ved Klubben er lite tenleg. Planane syner ei ny lagshytte på nær 250 kvadratmeter inkludert garasje, og veg og parkeringsplass.

Ein intensjonsavtale er signert med Berge Grunneigarlag. Avtalen seier at hjelpekorpset får kjøpa tomta – som ligg i nærleiken av Osen, i retning mot Lii – for 500.000 kroner om Kvam herad godkjenner tiltaket.

Bygg i området skal etter kommuneplanen ikkje ha eit bruksareal som er større enn 120 kvadratmeter, og planen krev reguleringsplan for tiltak som kan få vesentleg verknad for miljø og samfunn. Plankravet gjeld noverande ubebygde område for fritidsbustader.

Hjelpekorpset har søkt om både rammeløyve og dispensasjon frå plankravet og byggjegrensa på 50 meter langs vassdrag i kommuneplanen.

Korpset er ein viktig ressurs for naudetatane, og ein reguleringsplan vil ikkje vareta behovet til hjelpekorpset, skriv rådmannen i saksutgreiinga. Dessutan vil ikkje ei beredskapshytte skapa presedens, fordi det ikkje er ei privat hytte, står det.

Når det gjeld byggjegrensa, meiner rådmannen at 30 meter til midten av vegen nedom hytta vil sikra eit vegetasjonsbelte mellom hytta og strandsona. Plasseringa tek omsyn til turstiar og skiløyper, og høgdeplasseringa er 4,5 meter over maksimal vasstand i Hamlagrøvatnet.

Rådmannen føreslår fleire vilkår for å godkjenna tiltaket og gje igangsetjingsløyve. Mellom dei er ein godkjend søknad om utvida bruk av avkøyrsla til Hamlagrøvegen og ein detaljert utomhusplan.

Vil selja hytte og byggja ny

Uroa naboar

Fire merknader til tiltaket er registrerte. Nokre naboar ynskjer ikkje at hytta skal brukast til næringsverksemd og utleige, og tykkjer at bygget vert for dominerande. Auka trafikk frå snøskuter, firhjuling og båt er uynskt. Naboane ottast verdiforringing av hyttene i området.

Tre av dei næraste hyttene til tomta skriv i ein felles uttale at Øystese Røde Kors Hjelpekorps bør riva og byggja ny hytte der laget held til i dag. Det var opphavleg planen.

Det vil medføra ei lita ulempe for hjelpekorpset samanlikna med dei store ulempene det planlagde tiltaket fører til for eksisterande hytter, skriv naboane.

H2 Hardanger AS, som er ansvarleg søkjar og prosjekterande, meiner at den nye lagshytta gjev betre tilgang og tryggleik, og at bruken av snøskuter er viktig for beredskapen. Ein garasje er naudsynt for å ta vare på utstyr og sikra rask utrykking, meiner verksemda.

Teikningane syner to soverom, kjøken, stove, lager, kontor, gang, bad, toalett og snøskutergarasje på hovudplan. I andre etasje er det planlagt fire soverom og ein hems.