Vil setja opp mobile hytter

Det kjem fram i referatet frå ein førehandskonferanse med Kvam herad 21. oktober. Tiltakshavar og eigar av «NAF-en», der landhandelen ligg, er Emor AS. Dei gamle hyttene ligg i nærleiken av bygget.

Dei nye hyttene måler 4 gonger 10 meter og 4 gonger 12 meter, og er produserte i Polen. Dei skal stetta krava i dei tekniske forskriftene for tilsvarande ordinære hytter.

Prosjektleiar Stein-Harald Aasebø i AdvisorWest, som er ansvarleg søkjar, spurde om det vil vera mogleg å seksjonera og selja dei mobile heimane, med ein avtale om utleige når dei ikkje vert nytta av eigaren. Planleggjar Trond Tystad i Cardo 8614 AS, også han representant for tiltakshavaren, meinte det ville vera uheldig for tiltakshavar å selja delar av arealet før reguleringsplanen er ferdig.

Emor AS har ymta om at selskapet seinare vil byggja på NAF-en. Tiltaket må ikkje vera til hinder for det, påpeika rådmannen.

Ansvarleg søkjar og planleggjar legg opp til eit parallelt løp mellom søknad om dispensasjon og ny reguleringsplan. Planleggjar, ansvarleg søkjar og tiltakshavar må drøfta saka og unngå at tiltak kjem i strid med pågåande reguleringsplan, heiter det i konklusjonen etter møtet.

Sidan dei nye hyttene har bad og skal koplast til vass- og avløpsnettet, er det viktig at det vert levert ein teknisk plan, skriv heradet. Dei mobile heimane må vera i samsvar med gjeldande forskrifter og plasserast i tråd med avstandsreglane med omsyn til brannsmitte. Dei må òg ha tilstrekkeleg uteområde, særleg fordi det kan koma ynske om seksjonering av eigedomen. Heradet meiner det vil vera uheldig å seksjonera før området er regulert.

Området ved NAF-en er råka av rekkjefylgjekravet i kommunedelplanen for Kvamskogen. I dette tilfellet er det ikkje snakk om å auka talet på einingar, men å fornya dei som er der i dag. Det «kan vere» usikkert om rekkefylgjekravet vil råka dei mobile hyttene, skriv rådmannen.