– Vil selja til Tbm Maskin
Torsdag røysta Ullensvang formannskap for å selja den omstridde sentrumstomta i Jondal til det nye selskapet til Tore Eiken – Tbm Maskin AS.
Eirunn Lothe Midtun (Ap) synest det er sørgjeleg at saka i heile teke vart teken opp att, etter at kommunestyret i desember 2023 røysta for å selja tomta til Hardanger Maskin AS.
Hardanger Maskin vart etter vedtaket slege konkurs, og sidan kjøpte Tbm Maskin – også det Eiken sitt selskap – konkursbuet. Verksemda hevda å ha rett på tomta, men eit advokatfirma rådde kommunen til å ta saka opp på ny.
I tillegg til Tbm Maskin har Kåre Jørgen Underhaug og ekteparet Reidun Haugland Eide og Leiv Kåre Eide søkt om å få kjøpa tomta. Rådmannen hadde inga tilråding i saka, men la fram tre alternativ:
• Å selja delar av tomta til Tbm Maskin til takst, med vilkår om at tomta vert tilrettelagd på ein god måte.
• Å leggja ut tomta for sal til høgstbydande, i tråd med gjeldande reguleringsføremål.
• Å stoppa salsprosessen og vurdera tomta igjen i samband med ny sentrumsplan for Jondal.
Ingen «time out»
Terje Kollbotn (R) tala for å gå for alternativ tre og utsetja salet, og heller ta temaet opp att i samband med ein sentrumsplan for Jondal. Då kunne ein ha sett området i samanheng med kommunen elles, og høyrt kva dei som bur i området, kan tenkja seg å prioritera.
– Eg trur me treng ein liten «time out» i arealdisponering, ikkje berre i Jondal sentrum, sa Kollbotn.
Jørund Kvestad (Sp) er samd. Er det eit industriområde politikarane og innbyggjarane ynskjer seg der, med tilkomstveg gjennom eit bustadfelt? spurde han.
– Det finst andre ledige industriareal, la han til.
– Viktig inntekt
Midtun tala for å selja tomta til Tbm Maskin, og skrytte av både Eiken og verksemda.
– Her har me noko så fantastisk som ein lokal ullensvangar. Ein av våre eigne, som har drive verksemd i fleire tiår. Kor mange titals tilsette og kor mange – sikkert milliardar – hans bedrift har omsett for, har eg ikkje tal på. Men det eg veit, er at selskapet per i dag har inngått avtalar for 250 millionar kroner dei neste to åra, sa ho.
Hardanger Maskin vart etablert for 13 år sidan, og har ifylgje proff.no sidan då hatt ei samla driftsinntekt på om lag 476 millionar kroner.
Ingen røysta for å leggja ut salet til høgstbydande. Alternativ 1 og 3 vart sett opp mot kvarandre, og alternativ 1 vann fram med 8 mot 5 røyster. Berre R og Sp ville utsetja saka. Eit tilleggsforslag frå ordførar Roald Aga Haug (Ap) om å gje rådmannen fullmakt til å laga vilkår for trygg transport i området vart samrøystes vedteke.
HF gjer merksam på at Tore Eiken er son til ektemannen til mor til redaktør Sigbjørn Linga. Red.
