Vil selja hytte og byggja ny

Hytta i den opphavlege planen er både teikna, søkt om og godkjend. Så tok saka ei ny vending. No ynskjer laget heller å selja lagshytta på Klubben i Hamlagrø, og byggja ei ny ikkje langt frå Osen, i retning Lii.

Tanken om å byggja ei ny hytte nær Osen har vore der i mange år, fortel Erlend Flotve i Øystese Røde Kors Hjelpekorps. Men det var fyrst no laget fekk moglegheit til å kjøpa tomt. Øystese Røde Kors har inngått ein intensjonsavtale med Berge Grunneigarlag, og får kjøpa tomta for 500.000 kroner om Kvam herad godkjenner tiltaket.

Det er ført opp om lag tretti hytter i det aktuelle området, og området er uregulert. Arealet er sett av til fritidsbustader i kommuneplanen. Praksis har vore at allereie frådelte tomter kan byggjast ut, skreiv heradet i eit møtereferat i fjor haust.

– Det er forståeleg at ei ny hytte med plassering nærare veg og annan infrastruktur vil gjera arbeidet til laget lettare, skriv heradet.

Bygg i området skal ikkje ha eit bruksareal som er større enn 120 kvadratmeter. Teikningane viser ei hytte på nær 250 kvadrat. Hjelpekorpset har difor søkt Kvam herad om dispensasjon.

Vil låna hytta ut

Laget meiner den eksisterande hytta er lite tenleg for dagens bruk. Bruken har endra seg dei siste åra og er meir prega av korte opphald i samband med vakt eller aksjonar. Det er trong for ei hytte som krev lite vedlikehald og som er lett å ta i bruk, står det i dispensasjonssøknaden.

Dessutan vil Raudekrossen lata andre disponera hytta når ho ikkje er i bruk, og dreg fram skuleklassar og sommarleirar som døme. Det er òg skrive intensjonsavtale om utleige til vidaregåande skular, vert det opplyst i søknaden.

Teikningane viser ei hytte med seks soverom. Bruksarealet inkluderer ein skutergarasje på om lag førti rutemeter. Garasjen vil forenkla vedlikehaldet av skuterar og utstyr, og sikra at utstyret verkar når det er behov for det, skriv laget i søknaden.

– Dominerande

Fleire reagerer på planane. Frå dei 17 bruks- og festenummera som vart nabovarsla, kom det fire merknader. Mellom andre Marit Askeland og Espen Brynhildsen er skeptiske. Dei meiner mykje i søknaden er oppsiktsvekkjande.

– Det høyrest ut som om det skal drivast velgjerdshjelp, men ein må sjå på realitetane. Realitetane er at det skal byggjast eit kurs- og konferansesenter på minst eit kvart mål, står det i merknaden.

Hyttenaboane meiner det er det kommersielle som står i fokus, og ikkje eventuelle redningsoppdrag. Etter deira meining må prosjektet stoppast eller flyttast lenger inn mot Stølselvi.

– Bygningen vert altfor stor og dominerande i området, skriv dei.

Øystese Røde Kors skriv i eit tilsvar at utleige av hytta og transportkøyring med snøskuter er eit viktig bidrag til inntektsgrunnlaget for drifta av laget, men at hovudvekta av aktivitetane utanom hjelpekorpsarbeid vil dreia seg om rekruttering og integrerings- og inkluderingsarbeid.

– Ei hjelpekorpshytte er ikkje eit kurs- og konferansesenter, men eit viktig utgangspunkt for tryggleik ved aksjonar, og for opplæring i viktige tema innan søk og redning, skriv laget.

Ei betre løysing

Britt Brudvik og Leiv Magnus Grøtte skriv i sin merknad at hjelpekorpset gjer eit godt arbeid og har ein viktig beredskap i området. Det er godt å vita at Raudekrossen er i nærleiken, skriv paret. Likevel meiner dei at utnyttingsgraden overgår all fornuft, og at den visuelle verknaden vil få store konsekvensar for omgjevnadene.

– Hytta bør byggjast ein plass der ho kan liggja like usjenert til som noverande lagshytte gjer, eller eventuelt rusta opp eksisterande lagshytte, skriv Brudvik og Grøtte.

Ifylgje dispensasjonssøknaden vil det nye alternativet gje laget tilgang til nettspenning, vera ei betre løysing økonomisk sett og gje enklare og raskare utrykking og tryggleik for personell og utstyr.

– Om de ikkje får dispensasjon, er det framleis aktuelt å byggja som fyrst planlagt?

– Det er noko me må ta stilling til om det skjer. Me håpar dette alternativet går gjennom, seier Flotve.