Vil selja fjordopplevingar
Verksemda See the Fjords AS ber om betre kaiar for yachtar på Utne, Nå og i Jondal.
Det skriv Svein Kaptein Hovden i eit innspel til hamneplanen for Ullensvang.
Han fraktar turistar med ein Princess 50. Båten går til dømes mellom Bergen og dei ulike bygdene, hotella og restaurantane i Ullensvang. På Utne og Nå ser Hovden behov for lågare kaiar, optimalt 20 meter lange betongflytebryggjer.
I Jondal er den kommunale kaien for høg til at han kan nyttast av mindre båtar. Jondal er ei viktig reiselivsbygd, og høve til tilkomst med båt er viktig, skriv Hovden. Han har ofte med seg reisande som vil til Folgefonna og Hardanger House.
Det finst ei kommunal flytebryggje på 15 meter for småbåtfolk som vil til Jondal, om ein ser vekk frå småbåt- og gjestehamna for faste plassar og overnattingsbesøk, påpeikar Hovden. Flytebryggja er ofte full på sommaren, og skulle vore lengd med ein seksjon til, meiner han. Det ville ha gjort det enklare å gå i land i Jondal.
Det er vedteke i kommuneplanen for Ullensvang at turisme er positivt, påpeikar Hovden. Den politiske strategien er å leggja til rette for sal av opplevingar knytte til fjorden og å ha aktivitet heile året. For å klara det, krevst betre kaitilhøve på nokre av dei viktigaste turiststadene, meiner Hovden.
