Vil satsa på borna

Jasper Seetzen og Heidi-Emilie Olderøy Holmen er elevar ved den vidaregåande skulen. Seetzen fortel at dei i år har programfaget entreprenørskap på timeplanen. Medan han er økonomiansvarleg i den nyetablerte bedrifta, har Holmen rolla som dagleg leiar.

Holmen forklarar at gruppa valde å starta ei bedrift som skal vera eit sosialt alternativ for born i Kvam herad. Tilbodet rettar seg mot born og unge frå 3 til 12 år.

– Me har snakka om at det har vorte litt dårleg miljø blant born i bygdene. Dette vil me gjera noko med. Me ynskjer å arrangera friluftsaktivitetar for born og unge, seier ho.

HR og kontaktperson Thethe Longo seier at dei truleg vil skipa til dei fyrste turane og aktivitetane 11. januar.

Aktivitetane skal vera varierte, opplyser nestleiar og PR-ansvarleg Linnea Andrine Lægland. Opplegga skal finna stad ute i frisk natur, og gruppa vil finna på aktivitetar som turar, skattejakt og grilling saman med borna.

Mange av aktivitetane vil verta arrangerte på Framnes, men bedrifta vil også reisa rundt til bygdene Strandebarm, Øystese og Norheimsund.

Bedrifta ser for seg at opplegga skal vera delte i tre ulike aldersgrupper. Den fyrste gruppa er 3–6 år, den andre er 1.–4. trinn og den tredje er 5.–7. trinn.

Aktivitetane skal vera to gonger i månaden for kvar av gruppene, og dei skal etter planen vara i om lag halvannan time. Føremålet med gruppene er å tilpassa aktivitetane til dei forskjellige aldrane, slik at det vert kjekt for flest mogleg, forklarar dei unge entreprenørane.

Holmen fortel at bedrifta vil prøva å leggja til rette for at tilbodet skal vera lett tilgjengeleg for alle. Ho forklarar at det er heilt gratis for borna å delta, og at dei vil nytta Facebook til å informera borna om dei komande arrangementa.

Bedrifta har fått pengar frå Sparebanken Vest, Kvam Kraftverk AS og Den Norske Turistforening til prosjektet.

HF gjer merksam på at artikkelforfattarane er mediefagelevar på Framnes Kristne Vidaregåande Skule, og at intervjuobjekta er nokre av medelevane deira. Red.